Il-frustrazzjoni mil-lenti tal-ħaddiema reġgħet ħarġet fil-beraħ wara l-messaġġ qawwi u personali maqsum minn Johan Mifsud, li rrakkonta kif qatta’ aktar minn erba’ sigħat jistenna biex jitla’ fuq il-vapur tal-Gozo Channel biex jerġa’ lura Għawdex wara ġurnata xogħol.
Skont Mifsud, il-problemi bdew sa minn kmieni filgħodu, meta qatta’ sagħtejn oħra jistenna, sitwazzjoni li wasslitu biex jikkanċella l-appuntamenti kollha li kellu u, kif jgħid hu stess, “bażikament tlift ix-xogħol kollu ta’ filgħodu”. Din is-sitwazzjoni, li skontu għadha tiġi aċċettata bħala “normali”, tqajjem mistoqsijiet serji dwar kif servizz daqshekk essenzjali għadu jħalli lil tant nies f’din l-inċertezza.
Fost il-punti ewlenin li jisħaq fuqhom Johan hemm in-nuqqas ta’ aġġornamenti ċari u dettaljati. Huwa jargumenta li kieku n-nies ikunu jafu x’inhu jiġri u kemm mistennija jdumu, ħafna setgħu jorganizzaw ruħhom aħjar – jaħdmu online fejn possibbli, jevitaw li joħorġu fit-traffiku bla bżonn, u b’hekk titnaqqas ukoll il-konġestjoni fit-toroq.
“Mela qed nitkellmu dwar affarijiet verament straordinarji,” jistaqsi Mifsud, “jew sempliċement dwar komunikazzjoni bażika u sens komun?” Il-messaġġ tiegħu jispiċċa b’sens ta’ għeja u diżappunt, b’ħafna mistoqsijiet li jibqgħu mingħajr tweġiba. Mistoqsijiet li, bħal tiegħu, qed jinqasmu minn ħafna oħrajn li jiddependu kuljum fuq dan is-servizz.
Facebook/ Johan Mifsud
