Il-Fondazzjoni għas-Servizzi Edukattivi (FES), li minn mindu twaqqfet fl-2001 ilha pilastru fis-servizzi ta’ edukazzjoni u kura li tmur lil hinn mill-konfini tal-iskola, illum tmexxi 14-il ċentru ta’ childcare, 38 ċentru ta’ Klabb 3-16 u 58 ċentru ta’ Skolasajf. Dan kollu f’ambjent fejn id-domanda għal servizzi ta’ kwalità tkompli tikber u l-aspettattivi tal-ġenituri u tal-komunità qed jevolvu b’pass mgħaġġel.
Biex jiżguraw li jibqgħu fuq quddiem nett tal-innovazzjoni edukattiva – u f’konformità mal-Istrateġija Nazzjonali tal-Edukazzjoni 2030, l-FES qiegħda kontinwament tevalwa, tissaħħaħ u ttejjeb il-programmi tagħha.
Missjoni f’Pajjiż li Huwa Meqjus bħala Ġgant fl-Edukazzjoni
Biex tespandi l-viżjoni tagħha u tħares lejn mudelli ta’ suċċess barra minn xtutna, l-FES nediet żjara ta’ tagħlim fl-Estonja permezz tal-fondi ERASMUS+. Delegazzjoni Maltija żaret diversi skejjel f’Pärnu, waħda mill-ibliet magħrufa għall-eċċellenza edukattiva tagħha.
Matul din iż-żjara, il-membri tad-delegazzjoni kellhom l-opportunità josservaw mill-qrib kif l-Estonja timplimenta edukazzjoni non-formali b’mod prattiku u effettiv – mudell li ħafna pajjiżi jarawh bħala wieħed li għandu jiġi segwit.
Fost dak li ntlemħu kien hemm:
- Mudelli differenti ta’ childcare,
- Kollaborazzjoni b’saħħitha bejn l-għalliema,
- Il-kunċett intriganti tal-‘hobby schools’, li joffri lit-tfal opportunitajiet aktar wiesgħa biex jiżviluppaw talenti u passatempi.
Għarfien Li Jista’ Jsaħħaħ Is-Servizzi f’Malta
L-osservazzjonijiet miġbura minn din l-esperjenza internazzjonali joffru għarfien siewi li jista’ jgħin lill-FES tkompli ttejjeb is-servizzi tagħha, filwaqt li tqis id-differenzi bejn il-kuntesti edukattivi Maltin—kemm dak formali kif ukoll dak non-formali.
Din l-inizjattiva ma kinitx possibbli mingħajr l-appoġġ ta’:
- Dr Kenneth Vella, Ambaxxatur tar-Repubblika ta’ Malta mhux residenti għall-Estonja u l-Finlandja,
- EUPA, l-Aġenzija tal-Programmi tal-Unjoni Ewropea f’Malta,
- Nordic Knowledge, organizzazzjoni li xxerred għarfien dwar is-sistema edukattiva Estonjana u l-kultura tal-pajjiżi Nordiċi.
