Darren Lynch, kunsillier tal-lokalità ta’ Raħal Ġdid, bħalissa jinsab il-Parlament Ewropew fejn qed jirrappreżenta b’mod uffiċjali lill-lokalità tiegħu f’livell Ewropew.
F’din iż-żjara, Lynch ħabbar aħbar ta’ prestiġju kbir għal Raħal Ġdid, hekk kif il-lokalità ġiet magħżula b’mod uffiċjali bħala European Town of Sport 2026 – rikonoxximent importanti li jenfasizza l-impenn tal-komunità lokali lejn l-isport, l-attività fiżika u l-ħajja sana.
Permezz ta’ messaġġ fuq il-midja soċjali, Lynch esprima l-kburija tiegħu kemm għall-opportunità li jirrappreżenta lil Raħal Ġdid fl-ogħla livelli tal-istituzzjonijiet Ewropej, kif ukoll għas-suċċess miksub mil-lokalità.
“Kburin li qed nirrappreżentaw lil Raħal Ġdid fl-ogħla livelli tal-Istituzzjonijiet tal-Parlament Ewropew, u aktar kburin li r-raħal tagħna rebaħ it-titlu ta’ European Town of Sports 2026,” kiteb Lynch fuq Facebook.
Dan it-titlu mistenni jġib miegħu numru ta’ opportunitajiet ġodda għal Raħal Ġdid, inkluż aktar investiment fl-infrastruttura sportiva, aktar attivitajiet għall-komunità u promozzjoni akbar tal-lokalità fuq livell internazzjonali.
Il-ħatra ta’ Raħal Ġdid bħala European Town of Sport 2026 titqies bħala rikonoxximent tal-ħidma kontinwa tal-kunsill lokali, tal-għaqdiet sportivi u tal-voluntiera li jaħdmu bla heda biex jinkoraġġixxu l-isport u l-parteċipazzjoni attiva fost ir-residenti ta’ kull età.
Facebook / Darren Lynch
