F’dinja mimlija pressjoni, deadline u ritmu mgħaġġel, dejjem aktar riċerka qed turi dak li ħafna minna diġà nħossu: il-vaganzi mhumiex lussu, imma bżonn. Skont diversi studji li qed iduru fuq il-mezzi soċjali, persuna għandha bżonn mill-inqas seba’ vaganzi fis-sena biex tnaqqas ir-riskju ta’ stress kroniku u dipressjoni.
Għalkemm dan in-numru jista’ jidher għoli għal xi wħud, l-esperti jisħqu li mhux qed nitkellmu neċessarjament fuq seba’ vjaġġi kbar jew għoljin. Anzi, vaganza tista’ tkun ukoll pawża qasira mill-ħajja ta’ kuljum: tmiem il-ġimgħa ’l bogħod, ġurnata mistrieħa mingħajr obbligi, jew sempliċement ħin iddedikat għalik innifsek.
Ir-riċerka tindika li meta l-bniedem jieqaf, anke għal ftit, il-ġisem u l-moħħ jibdew jirkupraw. Il-livelli ta’ stress jonqsu, l-irqad jitjieb u l-burdata tibbilanċja ruħha. Barra minn hekk, vaganzi regolari jgħinu biex jitnaqqas ir-riskju ta’ burnout u problemi ta’ saħħa mentali fit-tul.
Interessanti wkoll li ħafna psikologi jenfasizzaw li l-aspett l-aktar importanti tal-vaganza mhuwiex il-post, iżda l-qtugħ mir-rutina u r-responsabbiltajiet. Li tkun preżenti fil-mument, ’il bogħod mill-emails, ix-xogħol u l-istennijiet ta’ kuljum, jagħti lill-moħħ spazju biex jieħu n-nifs.
F’soċjetà li spiss tfaħħar lil dawk li dejjem okkupati bħala sinjal ta’ suċċess, dawn l-istudji jfakkruna li l-mistrieħ huwa parti essenzjali mill-bilanċ tal-ħajja. Li tieħu vaganza mhix sinjal ta’ dgħjufija, imma ta’ kura personali.
Forsi, flok nistennew li naslu sal-punt tal-għeja, wasal iż-żmien nibdew naraw il-vaganzi bħala investiment fis-saħħa tagħna – mentali u fiżika – mhux bħala xi ħaġa li nagħmlu biss meta “jifdal il-ħin”.
