Ixxerja

L-Ajruport Internazzjonali ta’ Malta se jkun qed iżid 32 bank ġdid taċ-check-in, ħames gates tat-tluq u faċilitajiet estiżi għall-bagalji bħala parti minn proġett ta’ espansjoni maġġuri li mistenni jitlesta sal-2028. Dan tħabbar mill-Kap Eżekuttiv tal-ajruport, Alan Borg, waqt attività għall-midja.

Borg saħaq li l-għan ewlieni tal-proġett mhuwiex biss li jiżdied in-numru ta’ passiġġieri, iżda li titjieb il-kwalità tas-servizz offrut fl-ajruport. “Qed nibnu ajruport akbar mhux biex nattiraw aktar passiġġieri biss, imma biex intejbu l-esperjenza ta’ dawk li jużaw l-Ajruport ta’ Malta,” qal Borg.

Il-proġett se jinkludi wkoll gate ġdid għall-krew, filwaqt li l-ispazju għall-moviment tal-passiġġieri se jiżdied b’2,300 metru kwadru. L-hekk imsejjaħ East Expansion Project beda fi Frar tal-2025 bħala parti minn programm ta’ investiment ta’ €345 miljun mifrux fuq erba’ snin.

Skont Borg, it-terminal il-ġdid se jinkorpora elementi ta’ awtentiċità Maltija, bħall-arkati tal-ġebla tal-franka, filwaqt li jżomm kontinwità viżiva mat-terminal eżistenti. Id-disinn se jagħmel użu estensiv mid-dawl naturali u jenfasizza l-ospitalità Maltija, b’sostenibbiltà ambjentali tibqa’ prijorità ċentrali.

Anke l-Prim Ministru Robert Abela indirizza lill-ġurnalisti, fejn iddeskriva l-ajruport bħala aktar minn sempliċiment punt ta’ dħul. Qal li l-ajruport huwa mutur kruċjali għat-tkabbir ekonomiku, it-turiżmu, il-kummerċ u l-involviment internazzjonali, u li huwa l-ewwel u l-aħħar impressjoni li l-viżitaturi jieħdu magħhom minn Malta.

Abela sostna li dan l-investiment huwa importanti mhux biss biex jiġi estiż l-ajruport fiżikament, iżda wkoll biex jitjiebu l-istandards u jitħejja għall-futur. Huwa żied li l-proġett jaqbel mal-viżjoni tal-gvern għal Malta 2050, li mistennija titħabbar fil-ġimgħat li ġejjin.

Ta’ min ifakkar li f’Jannar tal-2020, l-Ajruport Internazzjonali ta’ Malta kien ħabbar pjanijiet biex jirdoppja d-daqs tiegħu, iżda dawn ġew sospiżi aktar tard dik is-sena minħabba l-impatt tal-pandemija tal-COVID-19 fuq l-industrija tal-avjazzjoni.

Ixxerja

Miktub Minn

Emil Calleja Bayliss

Iħobb il-lingwa Maltija u jsegwi b’mod attiv ix-xena mużikali lokali. Id-dinja tal-ispettaklu taffaxxinah u l-għaxqa tiegħu jara xows differenti. Biex jirrilassa Emil jieħu gost imur ħdejn il-baħar u fil-kampanja, hemm isib ftit kwiet ’il bogħod mill-ġenn.

Issa

Mark Tonna Jiċċelebra Għeluq Sninu – Kemm Taħsbu Li Għalaq Il-Kantant Veteran?

Emil Calleja Bayliss Illum

Illum huwa jum speċjali għal Mark Tonna hekk kif qed jiċċelebra għeluq sninu. Il-kantant miż-Żurrieq jagħlaq 63 sena! Mark huwa magħruf sew fil-qasam tal-midja u tat-televiżjoni f’Malta, fejn matul is-snin irnexxielu jibni karriera b’saħħitha u jakkwista l-apprezzament ta’ ħafna. Tul il-karriera tiegħu, Mark kien involut f’diversi proġetti u produzzjonijiet li ħallew impatt fuq ix-xena lokali, […]