L-MCAST Institute of Community Services (ICS) sellmet b’niket kbir lil Mariah Magro, studenta żagħżugħa li kienet qed issegwi l-Advanced Diploma in Social Care.
F’messaġġ mimli emozzjoni, l-istitut fakkar lil Mariah bħala tfajla ħelwa, ta’ rispett, intelliġenti u eżemplari – kwalitajiet li ħallew impressjoni profonda fuq il-komunità edukattiva kollha. Mariah kellha aspirazzjoni ċara li tidħol fil-professjoni tan-nursing, b’ħolma waħda sempliċi iżda nobbli: li tgħin lill-oħrajn.
“Ħallejtna kmieni wisq,” qal l-ICS, filwaqt li żied li Mariah se tibqa’ għal dejjem tokkupa post speċjali fil-qalb tal-istitut u ta’ dawk kollha li kellhom ix-xorti jiltaqgħu magħha. L-istitut esprima l-kondoljanzi sinċieri tiegħu lill-familja kollha tagħha, kif ukoll lil oħtha Leanne Magro, li hija wkoll eks-studentessa tal-ICS.
Il-funeral ta’ Mariah se jsir is-Sibt 28 ta’ Frar fid-9:00 fil-Bażilija tal-Bambina fl-Isla. F’dan il-mument ta’ niket, il-komunità tal-ICS qed tingħaqad flimkien biex tfakkar ħajja żagħżugħa mimlija potenzjal u ġenerożità – tfakkira ta’ kemm impatt jista’ jkollha persuna waħda, anke fi żmien qasir.
L-aħħar xewqa tagħha kienet li jinġabru donazzjonijiet għal Puttinu b’hekk inħeġġu lil kulħadd jagħti l-kontribut tiegħu.
