F’post li deher fuq il-paġna The People of Malta, Rayson qasam ftit mill-esperjenza tiegħu dwar il-passjoni għax-xogħol fil-ġebla u kif illum sab postu fir-raħal ta’ Ħal Għaxaq. Rayson spjega kif dejjem jipprova jsib ideat ġodda u joħloq affarijiet differenti, speċjalment billi jaħdem bil-ġebla – materjal li jħossu partikolarment marbut miegħu.
“Dejjem nara x’nivvinta. Issa qed naħdem biex nagħmel niċċa hawn. Il-ġebla togħġobni,” qal. Hu rrakkonta wkoll kif minkejja li huwa mill-L-Isla, illum qed jgħix f’Ħal Għaxaq – raħal li jgħid li jogħġbu ħafna u fejn sab ambjent li jħossu komdu fih.
Rayson spjega li fir-raħal hemm ukoll kultura qawwija marbuta mal-festi, xi ħaġa li hu jħoss li tagħti aktar ħajja lill-komunità u li hu stess jieħu gost ikun parti minnha. B’ton ta’ ċajta, żied jgħid li jgħix tant viċin il-knisja li lanqas għandu bżonn alarm biex iqum filgħodu.
“Tant noqgħod viċin il-knisja li lanqas għandi bżonn nagħmel alarm biex inqum, iqajmuni l-qniepen!” qal b’tbissima. Il-kitba tiegħu tagħti ħarsa lejn storja ta’ persuna li sab passjoni fil-ħolqien u li sab ukoll komunità ġdida fejn iħossu tassew id-dar.
Facebook / The People of Malta
