Ilbieraħ ilkoll konna maħsuda bl-aħbar li ħalliena l-Maestro Aurelio Belli. Aurelio, imrobbi l-Ħamrun, miżżewweġ lill-kantanta lokali Gloriana Arpa Belli, u flimkien għandhom lil binthom Alexandra.
Gloriana kitbet messaġġ fejn esprimiet gratitudni lejn l-appoġġ u simpatija kollha li qed tirċievi kemm hi u kemm Alexandra.
“Għeżież ħbieb, kollegi u qraba, F’dawn il-ġranet ta’ niket kbir, qalbi maqsuma wisq biex inwieġeb it-telefonati u messaġġi tagħkom.”
Tħabbar anke d-dettalji tal-funeral.
“L-aħħar tislima ta’ żewġi Aurelio ser issir nhar is-Sibt 18 ta’ April fl-10:00 fil-Kolleġġjata Bażilika Sant’Elena, Birkirkara. Fid-08:45 jitlaq corteo mill-Każin Santa Liena Banda Duke of Connaught’s Own, Birkirkara akkumpanjat mill-banda tal-istess soċjetà.”
Id-difna ser issir fiċ-Ċimiterju ta’ Santa Marija Addolorata, Raħal Ġdid. Waqt il-funeral ser issir ġabra għall-Community Chest Fund, li għamlu tant kienu hemm għal Aurelio waqt l-agħar mumenti.
“Nirringrazzja lil dawk kollha li kienu ta’ spalla għall-familja tagħna: li tawh il-faraġ u l-appoġġ fil-mumenti ta’ bżonn u li ferħu miegħu u emmnu fih fil-mumenti s-sbieħ. Jekk jogħġobkom żommuna fit-talb tagħkom. Bi mħabba u niket profond, Gloriana”
Tinsabu f’talbna Gloriana u l-familja kollha f’dawn il-mumenti iebsin.
