Dar San Ġużepp, id-dar għall-anzjani ħarġet aġġornament dwar is-sitwazzjoni tagħhom rigward ir-residenti u l-membri tal-istaff li rriżultaw pożittivi għall-Covid-19. Din ir-residenza hija l-agħar dar milquta tal-anzjani f’Malta.
“Fid-dar bħalissa hemm 278 residenti li minnhom 113 ittestjaw pożittiv għall-Covid-19,” huma kitbu fuq il-midja soċjali. “Wieħed mill-modi li qed nużaw biex inrażżnu t-tixrid huwa billi nisseparaw ir-residenti skont ir-riżultati tat-test tagħhom, permezz ta’ gruppi. Każijiet pożittivi, każijiet negattivi, u persuni fil-kwarantina mhumiex f’kuntatt ma’ xulxin.”
Id-dar għandha appoġġ minn seba’ tobba: erba’ konsulenti u tliet tobba ġenerali li qed “jissorveljaw is-sitwazzjoni lejl u nhar. Kwalunkwe deċiżjoni klinika, bħal jekk resident għandux jibqa’ fid-dar, jew għandux jiġi trasferit lejn Mater Dei, tittieħed minnhom biss.” Proċeduri bħal dawn għaddejjin, lejl u nhar, fi btajjel pubbliċi, u anke fi tmiem il-ġimgħa huma assiguraw.
Huma nnutaw ukoll li bħalissa, 29 membru tal-istaff ittestjaw pożittiv u 50 ieħor jinsabu fi kwarantina. “Bil-kordinazzjoni bejn id-Dar tagħna u d-Dipartimenti kollha kkonċernati, irnexxielna nieħdu kontroll tas-sitwazzjoni tal-ħaddiema tagħna.”
“B’xorti tajba, bdejna nirċievu aħbarijiet ta’ staff li qabel kienu ttestjaw pożittivi, iżda issa rriżultaw negattivi għall-Covid-19,” qalu fl-istess post. “Qed nikkuntattjaw membri tal-familja tar-residenti li ttestjaw pożittiv, immedjatament wara li r-riżultati jingħatalna.”
“Fir-rigward tal-bqija tal-familji ta’ dawk ir-residenti li r-riżultati tagħhom huma negattivi, aħna wkoll f’kuntatt kostanti magħhom kollha, permezz ta’ messaġġi, telefonati, u e-mails. Il-maġġoranza tar-residenti li ttestjaw pożittivi huma bla sintomi,” huma kkonkludew.
