Lestu ruħkom għax il-mejda tal-pranzu preparata u lesta biex tilqa’ lil-mistiednin. Wara l-ewwel staġun ta’ suċċess kbir li żamm lill-udjenzi mwaħħlin quddiem l-iscreens tagħhom lejl wara lejl, Come Dine With Me Malta qed jirritorna bit-tieni staġun tant mistenni, li jibda nhar il-Ħadd 26 ta’ April fuq TVM.
Dan il-format lokali ta’ programm internazzjonali popolari se jerġa’ jixxandar mill-Ħadd sal-Ħamis fid-20:45, b’kontestanti ġodda, karattri memorabbli u ovvjament… id-drama madwar il-mejda ma tonqosx.
U iva, Eileen Montesin se terġa’ tkun magħna, bil-vuċi ikonika tagħha tgħid eżatt dak li kulħadd id-dar ikun qed jaħseb. It-tieni staġun iwiegħed dak kollu li ħabbew it-telespettaturi u aktar. Minn koki dilettanti ambizzjużi li jridu jimpressjonaw, għal stili ta’ ospitar imprevedibbli, dan l-istaġun ġdid iġib taħlita ta’ platti li jiftħulek l-aptit, kompetizzjoni u mumenti mhux mistennija li jagħmlu lil Come Dine With Me Malta programm uniku.
U jekk taħseb li taf x’se jiġri… erġa’ aħsibha darbtejn. Bl-umoriżmu u togħma Maltija, il-programm ikompli jiċċelebra l-kultura lokali, l-ikel u l-personalitajiet b’mod li jolqot lil kulħadd madwar il-gżejjer. Kemm jekk huma ta’ suċċess fil-kċina jew diżastri totali, ħaġa waħda hija ċerta, li kważi l-ebda ikla ma tmur eżatt kif ippjanata.
Allura agħmlu nota fid-djarji tagħkom u ippreparaw ruħkom biex tkunu mistiedna għal pranzu mill-kumdità tas-sufan tagħkom. Come Dine With Me Malta t-tieni staġun jibda nhar il-Ħadd 26 ta’ April, u jixxandar mill-Ħadd sal-Ħamis fit-20:45 fuq TVM.
