Dalwaqt ikollna nżidu ħaġa oħra mal-lista ta’ meta nkunu ħa nsiefru: passaport li juri prova ta’ tilqim kontra l-Coronavirus.
Skont stqarrija, l-Assoċjazzjoni Internazzjonali tat-Trasport bl-Ajru (IATA) bħalissa tinsab fil-proċess li tiffinalizza l-iżvilupp għal passaport diġitali għall-Covid-19 li għandu jinkludi informazzjoni dwar l-ittestjar u t-tilqim tal-passiġġier, dawn ikunu kollha vverifikati minn laboratorji, linji tal-ajru u aġenziji tal-gvern.
“Illum il-fruntieri huma magħluqa. L-ittestjar huwa l-ewwel mezz li jippermetti vjaġġar internazzjonali mingħajr miżuri ta’ kwarantina. It-tieni ċavetta hija l-infrastruttura tal-informazzjoni globali meħtieġa biex timmaniġġja, taqsam u tivverifika b’mod sigur id-data tat-test imqabbla mal-identitajiet tal-vjaġġatur f’konformità mar-rekwiżiti tal-kontroll tal-fruntiera,” qal id-Direttur Ġenerali u Kap Eżekuttiv tal-assoċjazzjoni, Alexandre de Juniac dwar il-passaport, imsejjaħ IATA Travel Pass.
“Il-prijorità ewlenija tagħna hija li nġibu lin-nies jivvjaġġaw mill-ġdid mingħajr periklu. Fil-perjodu immedjat dan ifisser li l-gvernijiet jingħataw kunfidenza li l-ittestjar sistematiku tal-Covid-19 jista’ jaħdem bħala sostitut għar-rekwiżiti tal-kwarantina. U dan eventwalment jiżviluppa fi programm ta’ vaċċin. L-IATA Travel Pass hija soluzzjoni għat-tnejn,” qal Nick Careen, il-VP Anzjan, l-Ajruport, il-Passiġġieri, il-Merkanzija u s-Sigurtà tal-IATA.
X’taħseb?
