Illum il-kantanta lokali maħbuba u magħrufa Eleanor Cassar waslet fl-aħħar sena tat-tletinijiet! Eleanor tagħlaq sninha u għall-okkażjoni xtaqet taqsam talba personali.
F’din it-talba personali Eleanor qed issemmi dak li tixtieq mill-qalb, aktar milli r-regali materjali. “Grazzi Mulej ta’ dan iż-żmien li għoġbok issellifni… Grazzi talli dejjem kont miegħi f’mumenti sbieħ kif ukoll diffiċli. Bl-għajnuna tiegħek bqajt għadejja u qatt ma nħossni waħdi. Meta waqajt dejjem kont int li ġbartni u tajtni kuraġġ li nerġa’ nibda. Ta’ dan Grazzi Mulej!”
Fit-talba Eleanor issemmi dawk in-nies li tant tħobb u huma importanti f’ħajjitha, fosthom il-familja. “Nixtieq nitolbok tkompli tgħini fid-djufijiet tiegħi… tgħini nħobb aktar… naħfer aktar lil min jagħmilli deni… niżżel fija l-paċi ħalli nkun nista’ nara s-sabiħ f’kollox… għini nkun umli ma’ kulħadd.. tħalli qatt is-suppervja tiegħi tirbaħ l-umiltà… nitolbok tkompli tagħtini s-saħħa ħalli nieħu ħsieb lil familti li inti għoġbok iżżejjini biha.”
Awguri minn qalbna Eleanor! Nixtiequlek dak kollu li tixtieq qalbek!
