Tiċċelebra għeluq sninha llum Lyndsay Pace, kantanta u kantawtriċi Maltija li ilha attiva fix-xena mużikali lokali għal numru ta’ snin.
Il-passjoni tagħha għall-mużika bdiet minn età żgħira, u matul is-snin żviluppat stil versatili. Fil-bidu tal-karriera tagħha kienet parti mill-girl band VIEVE, u aktar tard bdiet tibni karriera bħala artista solista b’diversi singles li daħlu fil-klassifiki tar-radju lokali, fosthom System Overload, Zip It Up u Going Under.
Tul il-karriera tagħha Lyndsay ħadet sehem f’diversi kompetizzjonijiet u festivals mużikali importanti, fosthom The Malta Eurovision Song Contest, X Factor Malta u Muzika Muzika, kif ukoll programmi internazzjonali bħall-Britain’s Got Talent.
Barra minn hekk ħarġet l-album tagħha Dopamine u diversi singles ġodda li komplew jesponu l-ħoss mużikali u l-arti tagħha.
Riċentement kisbet ukoll rikonoxximent fuq livell internazzjonali b’nominazzjonijiet u premjijiet fil-World Entertainment Awards f’Hollywood.
Fl-okkażjoni ta’ għeluq sninha, Lyndsay qasmet messaġġ personali u mimli enerġija mas-segwaċi tagħha fuq Instagram.
Fil-post tagħha qalet li, minkejja li qed tikber fl-età, hi tippreferi tħares lejn kull sena bħala progress ġdid fil-ħajja.
Hija rrimarkat li matul is-snin tgħallmet il-valur tal-kunfidenza fiha nnifisha, affrontat il-biżgħat tagħha.
Filwaqt li rringrazzjat lil kull min bagħtilha messaġġi u awguri li għamlu dan il-mument aktar speċjali.
Awguri mill-qalb Lyndsay! Nixtiqulek ħafna affarijiet sbieħ illum u dejjem!
