Il-ġimgħa d-dieħla, nhar il-Ħadd 19 ta’ April 2026, Triq Misraħ Għonoq, Mosta (fil-parkeġġ tal-MCAST Mosta) se tinbidel f’post mimli ħajja u divertiment hekk kif se tittella’ Festa Familja li toffri esperjenza unika għal kulħadd.
Din il-ġurnata hija mfassla biex tilqa’ lil kulħadd – tfal, żgħażagħ u adulti – b’varjetà kbira ta’ attivitajiet u attrazzjonijiet.
Se jkun hemm żona apposta għat-tfal, fejn jistgħu jilagħbu u jieħdu gost f’ambjent sigur u animat. Se jkun hemm ukoll VR Station li toffri esperjenzi virtwali eċċitanti.
Preżenti ħa jkun hemm wirjiet impressjonanti ta’ trucks, karozzi u muturi, li ser jolqtu lid-dilettanti ta-vetturi. L-ispettaklu jkompli b’wirjiet live li jżidu aktar enerġija u atmosfera festiva matul il-ġurnata kollha.
Naturalment, ma jonqsux lanqas il-kjoskijiet tal-ikel, fejn il-familji jistgħu jgawdu minn varjetà ta’ ikel u xorb delizzjuż.
Aktar minn sempliċi festa, dan l-avveniment għandu skop nobbli. Jayden Scicluna jorganizza din l-attivita f’għeluq sninu biex id-dħul kollu jmur b’risq Puttinu Cares, organizzazzjoni li tappoġġja tfal u familji fil-bżonn. Din hi t-tielet darba li Jayden qed itella’ Festa Familja b’risq nobbli.
B’hekk, kull min jattendi mhux biss se jqatta’ ġurnata sabiħa, iżda wkoll ikun qed jagħti kontribut importanti għal kawża ġusta.
L-avveniment qed jiġi organizzat b’kollaborazzjoni ma’ Dreamastic Party And More. Prosit kbira Jayden!
