Malta trid lura sinna preistorika ta’ kelb il-baħar li ngħatat bħala rigal lill-Prinċep George tal-Gran Brittanja min-naturalista Sir David Attenborough. L-argument hu li l-fossila għandha tintwera fil-gżira fejn ġiet skoperta.
Il-Ministru għall-Kultura Maltija Jose Herrera qal li s-sinna għandha tkun f’mużew lokali u wiegħed li se jibda l-proċess biex jerġa’ jġibha lura.
“Hemm xi artefatti li huma importanti għall-wirt naturali Malti u li spiċċaw barra l-pajjiż u jistħoqqilhom li jiġu rkuprati,” qal Herrera lit-Times of Malta, mingħajr ma ta dettalji ta’ kif kellu l-intenzjoni li jirkupra l-fossila.
Attenborough kien sab il-fossila waqt btala f’Malta fl-aħħar tas-sittinijiet. Il-fossila kienet imwaħħla f’ġebel tal-franka artab isfar, u huwa maħsub li għandha madwar 23 miljun sena. Is-sinna xi darba kienet ta’ speċi estinta ta’ kelb il-baħar ġgant li jista’ jikber sa 15-il metru.
“Aħna bir-raġun nagħtu ħafna attenzjoni lill-artefatti storiċi u artistiċi. Madankollu, mhux dejjem il-każ fl-istorja naturali tagħna. Jien determinat li nidderieġi bidla f’din l-attitudni,” qal il-ministru.
Facebook/Jose Herrera
