Waqt il-maltemp qawwi b’riħ magħruf bħala Harry li ħabat lill-gżejjer Maltin ilbieraħ, il-ħiliet u l-professjonalità tal-piloti ta’ KM Malta Airlines ħarġu b’mod ċar. Minkejja kundizzjonijiet diffiċli ħafna, il-linja tal-ajru nazzjonali rnexxielha tniżżel is-17-il titjira skedati b’suċċess, kollha mal-ewwel attentat.
Dan ir-riżultat impressjonanti jikkuntrasta ma’ dak ta’ linji tal-ajru oħra li kienu qed joperaw lejn Malta fl-istess ħin. Skont informazzjoni li qed tiċċirkola, titjiriet ta’ Ryanair esperjenzaw 12-il go-around, filwaqt li 8 titjiriet ġew devjati lejn ajruporti oħra. Saħansitra kien hemm titjira waħda li ma ppruvatx tinżel f’Malta u għażlet li tiddevja immedjatament. Min-naħa tagħha, Wizz Air kellha waħda mit-tliet titjiriet skedati tagħha tiddevja minħabba l-kundizzjonijiet tat-temp.
L-esperti tal-avjazzjoni spiss jenfasizzaw li deċiżjoni ta’ “go-around” jew ta’ devjazzjoni mhijiex falliment, iżda att ta’ responsabbiltà u prijorità assoluta lejn is-sigurtà. F’dan il-kuntest, il-piloti kollha li kienu qed joperaw ilbieraħ jistħoqqilhom rikonoxximent, kemm dawk li rnexxielhom jinżlu kif ukoll dawk li għażlu li jibdlu r-rotta għal inżul aktar sigur.
Madankollu, il-prestazzjoni tal-piloti Maltin ta’ KM Malta Airlines kienet waħda eċċezzjonali u qanqlet tifħir mifrux. Il-ħila teknika, il-kalma taħt pressjoni u l-esperjenza tagħhom mhux biss għamlu unur lill-linja tal-ajru, iżda wkoll lill-pajjiż kollu.
Dan l-episodju jfakkarna kemm hu kruċjali r-rwol tal-piloti u tal-ekwipaġġi fl-ajru, speċjalment f’kundizzjonijiet estremi. L-inżul ta’ ajruplan f’Malta deher kważi kompitu impossibbli fil-jum tal-maltempata, iżda l-professjonalità u s-sigurtà baqgħu l-pedament tal-avjazzjoni. Prosit tassew lill-piloti kollha, u b’mod speċjali lil dawk Maltin li wrew kuraġġ u ħila straordinarja.
Facebook / KM Malta Airlines
