Teżor kulturali ġdid issa jżejjen il-Mużew tal-Katidral ta’ Mdina. Il-Presepju Naplitan, xena monumentali tal-Milied li tiċċelebra l-arti Barokka u d-devozzjoni, ġie inawgurat uffiċjalment u jinsab issa fuq wirja permanenti għall-pubbliku tul is-sena kollha.
Għal snin twal, dan il-presepju straordinarju kien tradizzjoni maħbuba tal-Milied ġewwa l-Katidral, u kull sena jattira eluf ta’ viżitaturi bil-ħila artistika u d-dettall affaxxinanti tiegħu. Illum, grazzi għall-ġenerożità ta’ Monsinjur Dr Edgar Vella, li ta bħala donazzjoni l-kollezzjoni tiegħu ta’ aktar minn tliet mitt figura tas-seklu tmintax, dan il-kapolavur sab dar permanenti fejn jista’ jiġi ppreservat, studjat u apprezzat minn ġenerazzjonijiet futuri.
Imnissel fit-tradizzjoni sekulari Naplitana tal-arti tal-presepio, il-Presepju Naplitan jgħaqqad flimkien il-fidi, l-istorja u t-teatru. Ix-xeni tiegħu, mill-Misteru tat-Twelid, it-Taverna, l-Għajn u l-Pont, huma ħajjin bid-drama u s-simboliżmu. Anġli, bdiewa, negozjanti u nobbli jgħixu flimkien f’armonija miniaturali, jirriflettu l-enerġija tal-ħajja Naplitana fi żmien ir-Rejiet tal-Bourbon. Kull figura tal-fuħħar, liebsa drappijiet rikki fid-dettall u mqiegħda b’realiżmu espressiv, tixhed il-ħila tal-kbar artisti Naplitani bħall-Giuseppe Sanmartino, Lorenzo Mosca u Matteo Bottigliero.
Illum, esebit f’gallerija ddisinjata apposta fil-Mużew tal-Katidral, il-Presepju sar parti mill-wirt sagru u artistiku ta’ Malta, flimkien mal-kollezzjonijiet tal-arti fina, il-prints ta’ Dürer, l-fidda, u l-manuskritti illuminati. Id-daqs u l-ħila tiegħu jagħmluh wieħed mill-aktar proġetti kulturali sinifikanti fil-pajjiż, li jattira mhux biss lill-fidili, iżda wkoll lil dawk li jħobbu l-istorja, l-arti u l-ġmiel tal-kreattività umana.
Għalkemm it-tnedija tiegħu ġiet fi żmien il-Milied, il-Presepju Naplitan jibqa’ attrazzjoni tul is-sena kollha, ċelebrazzjoni ta’ arti, fidi u tat-tradizzjoni fil-qalba stess tal-Imdina.
