Glen Ciantar iħalli dan il-ħsieb dwar l-indafa ta’ pajjiżna stess fejn għandha tibda mill-attitudni tagħna nfusna.
“Jekk verament irridu Malta aktar nadifa u b’saħħitha, għandna bżonn aktar intenzjonijiet tajbin. Għandna bżonn attitudni x’nista’ nagħmel jien”, flimkien ma’ mentalità li tħares ’il quddiem.
Ħafna drabi noqogħdu nistennew lil ħaddieħor jagħmel xi ħaġa.Nippontaw subgħajna, nilmentaw, u nistennew il-mirakli. Imma l-bidla vera ma tibdiex barra — tibda minn ħdejn il-bieb tagħna.Mhux biżżejjed li naddfu quddiem id-dar tagħna u nxerrdu ż-żibel fit-triq. Dak mhux responsabbiltà ċivika — dak sempliċement qed ngħaddu l-problema lil ħaddieħor.
Mentalità vera ta’ “x’nista’ nagħmel jien” tfisser:
Ma narmux — ma narmux barra, ebda kaxxi taċ-ċikkulata fil-ġonna, ebda karta tal-pastizzi fil-kampanja. Nirrispettaw l-iskedi tal-ġbir tal-iskart — ma nħallux il-boroż barra meta jkun konvenjenti għalina biss.Niġbru ż-żibel li nsibu — anke jekk mhux tagħna.Naqtgħu mill-użu ta’ plastik ta’ darba — nużaw basktijiet, fliexken u kontenituri li jistghu jergaw jintuzaw. Nipparteċipaw jew nappoġġjaw ġranet ta’ tindif lokali — ftit sigħat fis-sena jagħmlu differenza kbira. Ngħallmu lit-tfal tagħna — bl-eżempju tagħna nuru kif in-natura għandha tkun rispettata kuljum. Inħawwlu siġar jew fjuri — anke ġnien żgħir fuq il-gallarija jgħin lin-naħal u jtejjeb l-arja.
Nagħżlu nimxu, nużaw ir-rota, jew nużaw it-trasport pubbliku meta jkun possibbli — innaqqsu t-tniġġis u nżommu t-toroq aktar nodfa. Inħeġġu lill-ħbieb u lill-familja jagħmlu l-istess — il-pressjoni pożittiva minn xulxin taħdem tassew.Għalhekk, li żżomm Malta nadifa m’għandhiex tkun ħaġa impossibbli. Il-problema mhix fil-ġeografija tagħna, imma fil-mentalità tagħna.Ejjew nieħdu r-responsabbiltà flok ngħaddu l-ħtija. Kull biċċa żibel li niġbru, kull borża li npoġġu fil-jum it-tajjeb, kull flixkun li nużaw, kull darba li ma narmux — kollox jgħodd.
Malta aktar nadifa tibda minnek. Tibda illum.”
Ritratti: Facebook / Glen Ciantar
