Din is-sena l-Ħamrun se jkunu qegħdin jorganizzaw it-13-il edizzjoni tal-Festival taċ-Ċikkulata li hu meqjus bħala wieħed mill-aqwa avvenimenti li qed jiġru f’Malta u l-festival tista’ tgħid ukoll li sar magħruf internazzjonalment. Għal din l-edizzjoni ħejjejew diversi kreazzjonijiet ġodda li żgur li se jinżlu għasel.
Fl-2022, 25,000 persuna attendew il-festival taċ-ċikkulata, avveniment uniku li jagħti opportunità speċjali lill-viżitaturi biex igawdu minn firxa wiesgħa ta’ prodotti relatati maċ-ċikkulata. Abbażi tas-suċċess tal-edizzjonijiet li għaddew, l-organizzaturi mxew pass ’il quddiem biex jagħtu atmosfera aktar mill-aqwa u ideat innovattivi b’attrazzjonijiet uniċi, speċjalment għal din it-13-il edizzjoni.
Ngħiduha kif inhi, il-kawkaw appella għall-immaġinazzjoni tan-nies għal aktar minn 2,500 sena. Skont ftit riċerka storika, ir-rabta tal-Ħamrun maċ-ċikkulata tmur lura għaż-żmien il-kavallieri ta’ San Ġwann fejn iż-żerriegħa tal-kawkaw kienet tinħażen fl-inħawi tas-Samra.
Il-Festival taċ-ċikkulata tal-Ħamrun se jsir is-Sibt filgħaxija fil-21 ta’ Ottubru 2023, fi Triq il-kbira San Ġużepp, magħrufa ma’ tal-lokal bħala Strada Rjali, fiċ-ċentru tal-belt l-antika tal-Ħamrun (ħdejn l-istazzjon tal-ferrovija – illum il-kwartieri tal-Iscouts tal-Ħamrun) u fit-toroq ta’ maġenbhom. Dawn iż-żoni se jkunu l-qalb tħabbat tal-festival fejn il-viżitaturi se jkollhom esperjenza unika taċ-ċikkulata.
Dawk kollha li jħobbu ċ-ċikkulata se jsibu teżor ta’ informazzjoni. It-temi jvarjaw mill-pjaċir u l-kreattività, sal-passjoni u t-tidwiq ta’ togħmiet mill-aqwa. Il-Festival taċ-ċikkulata tal-Ħamrun se jkun il-festival fejn dawk li qegħdin fuq xi dieta se jispiċċaw jagħmlu xi dnub jew tnejn, jekk mhux iktar iżda s-sensazzjonijiet ta’ dawn it-togħmiet taċ-ċikkulata ġejjin mhux minn Malta biss, iżda anke mill-Italja, il-Ġermanja, il-Belġju, l-Amerika, il-Brażil, ir-Renju Unit, u l-Marokk fost oħrajn.
It-togħmiet jisseduċu lill-pubbliku u jdaħħluhom f’atmosfera ta’ indulġenza u tgawdija. Waqt dimostrazzjonijiet fil-post, numru ta’ koki, furnara u dawk li jagħmlu ċ-ċikkulata ħa jħallu lill-viżitaturi jiskopru l-kreazzjonijiet taċ-ċikkulata u r-riċetti li jistgħu jippruvaw huma stess. Se tingħata attenzjoni lill-firxa wiesgħa ta’ kreattività varja biċ-ċikkulata, prinċipalment:
- Pittura taċ-ċikkulata fuq it-tila
- Skulturi taċ-ċikkulata
- Biċċiet taċ-Ċentru taċ-ċikkulata
- Dimostrazzjonijiet diretti bl-użu ta’ riċetti varji taċ-ċikkulata
Ħa jkun hemm ukoll rokna speċjali għat-tfal fejn jistgħu jesperjenzaw iċ-ċikkulata b’modi differenti. Ftit huma t-tfal li jgħidu le għaċ-ċikkulata! Fl-Italja, Modica hija wkoll magħrufa mmensament għaċ-ċikkultata u għandhom ukoll festivals li jiċċelebraw dan! Għalhekk għall-edizzjoni ta’ din is-sena se jkun hemm ukoll ċikkulatini u parteċipanti oħra minn ChocoModica Festival.
Dan l-avveniment qed jiġi organizzat mill-Kunsill Lokali tal-Ħamrun, b’kollaborazzjoni mal-Ministeru għall-Kultura, l-Arti u l-Gvern Lokali, The Malta Diary Products, il-Ħamrun Business Community u diversi għaqdiet lokali taħt id-direzzjoni artistika u l-brainchild ta’ dan l-avveniment, is-Sur Mario Camilleri, MA.
