Is-sajf jidher li wasal kmieni hekk kif Malta mistennija tesperjenza l-ogħla temperaturi tas-sena s’issa, bil-merkurju mistenni jilħaq it-30°C sal-Ġimgħa li ġejja.
Skont aġġornament maqsum mill-paġna Maltese Islands Weather, il-gżejjer Maltin se jidħlu f’perjodu ta’ temp aktar sħun u stabbli, b’temperaturi matul il-lejl ukoll mistennija jibqgħu qrib l-20°C.
It-tbassir juri ġimgħa b’ħafna xemx u ftit sħab biss f’ċerti ġranet, hekk kif it-temperaturi se jibdew jitilgħu gradwalment minn 27°C u 28°C fil-bidu tal-ġimgħa sa 30°C sal-Ġimgħa.
Il-kundizzjonijiet tal-baħar mistennija jibqgħu kalmi, filwaqt li ċ-ċans ta’ xita huwa kważi ineżistenti, b’0mm xita mistennija tul il-jiem kollha tat-tbassir.
Anke r-riħ mistenni jibqa’ ħafif għal moderat, kundizzjonijiet ideali għal min qed jippjana ġurnata fuq il-bajja, għawma jew attivitajiet fil-beraħ hekk kif Malta tibda tħoss aktar l-atmosfera tas-sajf.
Dettall ieħor importanti huwa l-livell għoli ħafna tal-UV index, li mistenni jilħaq livell 10 f’diversi ġranet tal-ġimgħa. Għalhekk, l-awtoritajiet tas-saħħa ġeneralment jirrakkomandaw li wieħed jieħu l-prekawzjonijiet meħtieġa meta jkun espost għax-xemx għal ħin twil.
Wara rebbiegħa b’temp instabbli u kundizzjonijiet li spiss jinbidlu minn ġurnata għall-oħra, din il-ġimgħa mistennija ġġib magħha l-ewwel togħma vera tas-sajf Malti għall-2026, b’jiem itwal, ibħra aktar sħan u temperaturi li qed ikomplu jogħlew.
