Jax reċentement għex esperjenza speċjali ħafna meta ġie magħżul biex jieħu sehem f’reklam għal żmien il-Milied. B’entużjażmu kbir, Jax stqarr li ħassu verament kburi li ntgħażel għal dan ir-rwol, li jqisu bħala pass ieħor importanti fil-karriera tiegħu u esperjenza li żgur se jibqa’ jġorr miegħu.
Ir-reklam jirrakkonta storja mimlija maġija dwar tifel li jirċievi kalendarju tal-Avvent, u kull darba li jiftaħ biċċa minnu, jidħol f’dinja maġika. Jax interpreta l-karattru ewlieni, Żak, rwol li kiseb wara audition u li tah l-opportunità juri l-ħila tiegħu quddiem udjenza wiesgħa.
Meta tkellem dwar il-filming, Jax qal li kien hemm diversi mumenti indimentikabbli. Wieħed mill-aktar favoriti tiegħu kien meta niżlu taħt l-art f’post magħruf bħala l-Ġibjun, li kien nofsu mimli bl-ilma, ambjent li żied ħafna mal-atmosfera misterjuża tar-reklam. Xena oħra li għoġbitu ħafna kienet dik fl-ITS, għalkemm ammetta li wara sigħat twal ta’ filming beda jħoss l-għeja, speċjalment f’saqajh.
Għalkemm din ma kinitx l-ewwel darba tiegħu quddiem il-kameras, Jax spjega li kienet l-ewwel darba li x-xogħol tiegħu “mar viral”, b’eluf ta’ nies jaraw ir-reklam u jħallu kummenti pożittivi li tassew ħeġġewh. Huwa żied li l-preparazzjoni tiegħu kienet sempliċi: studja l-iskript sew u, fuq kollox, ħa gost jagħmel dak li jħobb.
Matul il-ġurnata tal-filming, Jax għamel diversi ħbieb ġodda, inkluż mal-cast u l-istaff kollu involut fil-produzzjoni. Huwa qal li kull xena kienet speċjali u li jsibha diffiċli ħafna jagħżel waħda favorita, għaliex ħa gost f’kull waħda mix-xeni.
Meta mistoqsi dwar il-futur, Jax ikkonferma li jixtieq ħafna jerġa’ jagħmel esperjenzi simili fil-media, għax iħossu naturali quddiem il-kamera u ma jkollux għalfejn jisforza ruħu biex iwassal il-linji tiegħu.
U għall-aħħar, ix-xewqa tiegħu għal dan il-Milied hija waħda sabiħa u sempliċi: li n-nies jagħmlu paċi ma’ xulxin, u awgurju speċjali lin-nanna tiegħu Lilly, li tagħlaq sninha l-għada tal-Milied, xewqa mimlija mħabba u spiritu veru tal-festi.
