Storja maqsuma minn People of Malta teħodna f’mument ta’ riflessjoni sempliċi iżda qawwija, fejn il-bidla, iż-żmien u l-kompassjoni jiltaqgħu f’ħajja waħda. Il-protagonist hu Bertu, raġel li bi ftit kliem imma mimlijin tifsira jirrakkonta kif inbidel l-ambjent ta’ madwaru u kif, mingħajr ma forsi rrealizza, biddel ukoll id-destin ta’ kelba li ħadd ma ried.
“Il-minutieri għaddejjin. Iż-żmien ifottik,” jgħid Bertu, waqt li jfakkar kif fejn illum hemm San Ġwann mimli bini, nies u kummerċ, darba kellu quddiemu l-baqar. Żona li minn waħda kwieta u rurali saret parti minn Malta urbana, b’ħajja kontinwa u moviment bla waqfien. Minkejja n-nostalġija, Bertu jammetti li hemm ukoll is-sabiħ tagħha: in-nies, l-attività u l-fatt li ż-żona kibret.
Ir-rutina ta’ kuljum tiegħu, iżda, għandha element li ma jinbidilx: il-mixjiet ta’ filgħodu u ta’ filgħaxija mal-kelba tiegħu, Lucky. U proprju hawn jidħol il-qofol tal-istorja. Lucky ma kinitx kelba mixtieqa. Kienet għand żewġ persuni li, kif jgħid hu stess, ma kinux jagħtuha kas. Eventwalment riedu jbigħuha, u f’dak il-mument Bertu ddeċieda li jdaħħalha f’ħajtu.
“Hemm raġuni għax semmejtha Lucky,” jgħid b’ċerta ironija ħelwa. Isem li jġorr miegħu storja ikbar milli jidher, kelba li minn waħda mwarrba saret parti minn rutina, kumpanija u affezzjoni ta’ kuljum. U fl-aħħar, Bertu jitfa’ mistoqsija li tmiss il-qalb, “Mhux b’xortiha li spiċċat miegħi?”
Storja li tfakkarna kif, f’nofs il-bidliet kbar taż-żmien u tal-postijiet, xi drabi l-aktar atti żgħar, bħal li tagħti dar lil kelba li ħadd ma ried, ikunu dawk li verament jagħmlu differenza. U forsi, f’din l-istorja, mhux Lucky biss kienet xortija, imma Bertu wkoll.
Facebook / The People of Malta
