Minħabba li tħabbret twissija meteroliġika safra, l-Awtorità tal-Bini u l-Kostruzzjoni (BCA) fakkret li għandhom jittieħdu l-prekawzjonijiet meħtieġa.
Huma kitbu, “L-Awtorità tal-Bini u l-Kostruzzjoni (BCA) qed tirreferi għat-Twissija Meteoroloġika Safra maħruġa mid-Dipartiment tal-Protezzjoni Ċivili għall-Gżejjer Maltin għal nhar it-Tnejn, 26 ta’ Jannar, fejn huma mistennija kundizzjonijiet tat-temp li jeħtieġu miżuri ta’ prekawzjoni, inklużi irjieħ b’buffuri qawwija li jistgħu jilħqu Forza 7, baħar imqalleb u ħalbiet tax-xita.”
Żiedu jgħidu, “Fid-dawl ta’ din it-twissija, il-BCA tfakkar lill-kuntratturi, żviluppaturi, maniġers tas-siti u lill-operaturi kollha fis-settur tal-kostruzzjoni bl-obbligu tagħhom li jieħdu l-prekawzjonijiet kollha meħtieġa sabiex jiġi ssalvagwardjat is-sigurtà tal-ħaddiema, tal-pubbliku u tal-proprjetajiet tat-terzi.”
L-operaturi huma mitluba
• Ineħħu materjal, tagħmir, partijiet ta’ scaffolding u strutturi temporanji li jistgħu jinġarru mir-riħ
• Jiżguraw li cranes, tagħmir ta’ rfigħ u strutturi temporanji jkunu siguri
• Jevalwaw kontinwament il-kundizzjonijiet tas-sit u jwaqqfu x-xogħlijiet meta t-temp ikun ta’ riskju
• Jiżguraw superviżjoni adegwata u konformità mar-rekwiżiti
Il-BCA se tkompli ssegwi mill-qrib l-andament tas-sitwazzjoni u l-operaturi huma mħeġġa jibqgħu viġilanti u jsegwu l-aġġornamenti li se jkunu qegħdin ikomplu jinħarġu skont il-ħtieġa.
Għall-aktar informazzjoni jew għal assistenza tistà ċċempel fuq il-helpline 138.
Facebook / Building and Construction Authority
