Il-komunità edukattiva tal-Kulleġġ Agius De Soldanis Middle School b’niket ħabbret il-mewt ta’ Mary Galea, il-klerk tant maħbuba li għal snin twal kienet wiċċ li jilqgħek bi tbissima u qalb miftuħa.
F’messaġġ pubblikat mill-iskola, intqal, “Huwa b’niket kbir li naqsmu magħkom l-aħbar tal-mewt tal-klerk maħbuba tagħna, Mary Galea. Mary ma kinitx biss membru dedikat tal-istaff tagħna, iżda kienet ukoll preżenza b’saħħitha u kuraġġuża li messet il-ħajja ta’ studenti, għalliema u ġenituri bl-istess mod.”
Huma jżidu, “It-tjubija, is-sabar u r-rieda kostanti tagħha li tgħin qatt ma tintesa. Il-komunità skolastika tagħna tilfet persuna tassew mill-aqwa. Jalla tistrieħ fil-paċi. Il-ħsibijiet u t-talb tagħna huma mal-familja tagħha u ma’ dawk kollha li ħabbewha f’dan il-mument diffiċli.”
Mary kienet magħrufa għan-natura sabiħa tagħha li dejjem lesta tisma’, tgħin u ssib soluzzjoni għal kull min kien ikollu bżonn l-assistenza. Il-kontribut tagħha ma kienx wieħed amministrattiv biss, iżda wkoll uman: kienet figura li ħafna setgħu jiddependu fuqha, kemm fil-mumenti ta’ bżonn.
Il-memorja tagħha tibqa’ ħajja fil-kurituri tal-iskola li kienet tant tħobb, fil-ħidma li wettqet b’dedikazzjoni u fl-istudenti u membri tal-istaff li qatt ma se jinsew il-ġenerożità tagħha. L-iskola, flimkien mal-komunità edukattiva kollha tingħaqad mal-familja Galea f’dan iż-żmien ta’ telfa u uġigħ.
Strieħ fil-paċi Mary!
