Il-kantant Malti Ozzy Lino se jkun qed jagħmel sfida straordinarja ta’ stamina u determinazzjoni permezz ta’ Singathon kontinwu ta’ 48 siegħa, bl-għan li jqajjem kuxjenza u jsaħħaħ id-diskussjoni dwar is-saħħa mentali. L-avveniment se jsir mis-6 sat-8 ta’ Frar 2026 fis-Sala tal-Planetarium fi ħdan Esplora, Villa Bighi, il-Kalkara.
Din l-inizjattiva qed tiġi organizzata b’kollaborazzjoni ma’ Caritas Malta, il-Mental Health Association Gozo, ir-Richmond Foundation u ċ-Ċentru Interattiv tax-Xjenza Esplora. Matul dawn it-48 siegħa, Ozzy Lino se jkanta live u bla waqfien, u kull kanzunetta se tkun interpretata minnu stess, akkumpanjat minn numru ta’ mużiċisti u kantanti mistiedna li se jinbidlu tul il-maratona. L-ismijiet tal-artisti lokali li se jakkumpanjawh se jitħabbru fil-ġranet li ġejjin.
“Dan mhux kunċert, imma test tal-ispirtu uman,” qal Ozzy Lino, li spjega kif l-isfida tmur lil hinn mill-aspett vokali. “Hija battalja kontra l-għeja, l-emozzjoni u l-limiti fiżiċi. Kull nota se tkun xhieda tar-reżiljenza u l-iskop wara din l-inizjattiva.” Matul il-48 siegħa, se jkun hemm mumenti ta’ kwiet, żidiet fl-adrenalina u anke dubju, iżda l-kant se jibqa’ għaddej bla waqfien.
Il-Kap Eżekuttiv ta’ Xjenza Malta, Silvio Scerri, iddeskriva s-Singathon bħala att qawwi ta’ solidarjetà li juża s-saħħa tal-mużika biex jiftaħ konverżazzjonijiet importanti dwar is-saħħa mentali, filwaqt li jinbena sens ta’ komunità u kompassjoni.
Min-naħa tagħha, Caritas Malta saħqet li din l-inizjattiva għandha valur doppju, minn naħa tgħin fil-ġbir ta’ fondi biex jissaħħu s-servizzi tagħha fis-saħħa mentali, kollha offruti bla ħlas, u min-naħa l-oħra sservi bħala sors ta’ ispirazzjoni dwar kif l-arti u l-mużika jistgħu jgħinu lill-individwu jesprimi l-emozzjonijiet u jegħleb l-isfidi.
Il-Mental Health Association Gozo u r-Richmond Foundation enfasizzaw ukoll l-importanza ta’ inizjattivi bħal dawn biex titqajjem kuxjenza, jissaħħaħ id-djalogu fil-komunità u tingħata vuċi lil persuni li qed jgħixu b’sfidi ta’ saħħa mentali.
Bħalissa hija miftuħa sejħa għall-voluntiera li jixtiequ jassistu matul is-Singathon, filwaqt li l-pubbliku huwa mħeġġeġ jattendi u jappoġġja din il-maratona unika. Id-dettalji dwar id-donazzjonijiet se jitħabbru fil-ġranet li ġejjin. Dan mhux biss avveniment mużikali, iżda moviment miftuħ għal kulħadd, imsaħħaħ mill-passjoni u mmexxi mill-mużika.
