Il-kantant leġġendarju Ingliż Sir Cliff Richard, li għandu 85 sena, żvela li qed jingħata kura għall-kanċer tal-prostata, wara li l-marda nstabet waqt check-up mediku relatat ma’ tour riċenti tiegħu.
F’intervista ma’ Good Morning Britain, Sir Cliff spjega li l-kanċer skoprih b’kumbinazzjoni, hekk kif kien qed jipprepara biex jibda tour fl-Awstralja u New Zealand. Huwa qal li l-organizzaturi tal-avvenimenti talbuh jagħmel eżamijiet mediċi bħala parti mill-proċess tal-assigurazzjoni.
“Kont wasalt biex nibda tour… kont sejjer l-Awstralja u New Zealand, u l-promotur qalli, “għandna bżonn l-assigurazzjoni tiegħek, allura trid tagħmel ‘check-up’,” spjega l-kantant.
Sir Cliff żied jgħid li, fortunatament, il-kanċer instab fi stadju bikri u ma kienx infirex għal partijiet oħra tal-ġisem. “Sabu li kelli kanċer fil-prostata, imma x-xorti t-tajba kienet li ma kienx ilu jeżisti. U ħaġa oħra importanti hija li ma kienx metastatizza. Ma kienx infirex fl-għadam jew xi mkien ieħor,” qal hu.
Fl-istess intervista, Sir Cliff uża l-esperjenza personali tiegħu biex iwassal messaġġ importanti lill-irġiel, dwar is-saħħa u l-vulnerabbiltà. “Naħseb li aħna l-irġiel… irridu nkunu meqjusa bħala bnedmin li jistgħu jmutu b’dan it-tip ta’ mard,” sostna l-artist.
Il-kantant, li ilu għexieren ta’ snin figura ikonika fil-mużika internazzjonali, qed jirċievi ħafna messaġġi ta’ kuraġġ mingħand il-partitarji tiegħu madwar id-dinja.
Nittamaw li Sir Cliff Richard jirkupra malajr u kompletament, u li l-esperjenza tiegħu tkompli tqajjem kuxjenza dwar l-importanza ta’ check-ups regolari, speċjalment fost l-irġiel.
Facebook / Cliff Richard
