Il-jum tal-Ħamis qed jibda b’twissija importanti dwar riħ qawwi li mistenni jolqot il-gżejjer Maltin matul il-ġurnata u jkompli jissaħħaħ aktar tard filgħaxija.
Skont aġġornament mill-paġna Mid-Djarju Tat-Timba, dalgħodu r-riħ qed jonfoħ moderat mil-Lbiċ u jdur lejn il-Punent. Madanakollu, hekk kif jgħaddi l-ħin, id-direzzjoni tiegħu mistennija tissaħħaħ u ssir aktar soda, speċjalment wara nofsinhar meta jdur għal Majjistru.
L-aktar kundizzjonijiet diffiċli huma mistennija filgħaxija u matul il-lejl, meta r-riħ se jkompli jiżdied fil-qawwa tiegħu, u jista’ jilħaq bejn Forza 7 u 8. Dan ifisser li jistgħu jinħolqu kundizzjonijiet imqallba, partikolarment f’żoni esposti u qrib il-kosta.
Għalkemm sa tard għada filgħodu r-riħ mistenni jnaqqas ftit, xorta se jibqa’ qawwi u jinħass sew. Fir-rigward tat-temp inġenerali, illum mistenni jkun ftit jew wisq imsaħħab, b’ċans żgħir ħafna ta’ xi raxxa xita. It-temperaturi se jilħqu massimu ta’ 17°C u jinżlu sa minimu ta’ 11°C matul il-lejl.
Il-pubbliku huwa mħeġġeġ joqgħod attent, speċjalment dawk li ser ikunu barra jew viċin il-baħar, hekk kif ir-riħ qawwi jista’ jġib miegħu kundizzjonijiet perikolużi.
