Il-personalità lokali Sarah Bajada qasmet messaġġ emozzjonanti u sinċier fuq il-midja soċjali hekk kif irriflettiet fuq sena li ddeskrivietha bħala vjaġġ mimli, sena li kienet mimlija sfidi, bidliet kbar u tkabbir personali profond għaliha.
F’messaġġ mimli onestà, Sarah tkellmet dwar kif l-2025 ġabet magħha mistoqsijiet li ma kinitx ċerta li kienet lesta twieġeb, u sitwazzjonijiet li qatt ma ħasbet li setgħet taffaċċja. Minkejja kollox, illum issib ruħha f’fażi ġdida ta’ ħajjitha – bidu ġdid, familja ġdida u ħajja ġdida.
Hija rrikonoxxiet ukoll li għal perjodu sparixxiet mill-pubbliku, partikolarment waqt il-kampanja politika ta’ Alex, hekk kif il-piż tal-ħajja sar wieħed tqil wisq u kellha bżonn tieħu l-ħin biex issib mill-ġdid l-istabbiltà tagħha. F’dawn il-mumenti, Sarah għażlet il-kuraġġ fuq il-kumdità, il-preżenza fuq il-perfezzjoni u l-verità fuq l-applaws.
B’mod ċar, hija tkellmet dwar ir-realtà li tkun mara, omm, sieħba ta’ mexxej politiku u kreattiva fl-istess ħin – irwoli differenti mmens li ħafna drabi hemm min jgħid li ma jistgħux jeżistu flimkien. Xi jiem ħasset saħħa kbira, f’oħrajn kienet għajjiena mmens, iżda kif stqarret hi stess, kuljum baqgħet tqum u tkompli.
Sarah esprimiet il-kburija tagħha fil-mara li ma ċedietx meta l-affarijiet saru diffiċli, fl-omm li għażlet il-paċenzja anke meta l-għeja kienet qawwija, u fil-verżjoni tagħha li baqgħet temmen, tappoġġja lil Alex u ssaħħaħ ir-relazzjoni tagħhom billi mexew din it-triq flimkien.
Fl-aħħar nett, hija rringrazzjat lill-2025 għal-lezzjonijiet, id-dmugħ u s-saħħa li ma kinitx taf li kellha. Messaġġ partikolari wasslet lil dawk li forsi din is-sena ħaditilhom aktar milli tathom: jekk għadek wieqaf, allura l-istorja tiegħek għadha ’l bogħod milli tispiċċa.
Facebook / Sarah Bajada
