Sabiħ li tagħti ħajja ġdida, ħajja aħjar lill-individwu. Sabiħ li ssir tħobb bi mħabba ta’ ġenitur. Noel jiftakar dan il-mument għażiż mill-qalb.
Hu jikteb, “Illum mhux għeluq sninek, imma huwa jum speċjali f’ħajti. Daniel, ibni l-kbir għażiż, int ma twelidtx f’dan il-jum, imma għalija, twelidt illum – f’qalbi u f’ħajti. Eżatt seba’ snin ilu, f’dan l-istess ħin, sirt ġenitur b’kburija kbira.”
Hu jgħid, “Kienet l-ewwel laqgħa tagħna fil-Portugall!!! Niftakar dak il-mument meta smajt leħnek jgħajjat mill-ħġieġ tat-tieqa, u għadni niftakar b’mod ċar meta għannaqna u bkejna flimkien għall-ewwel darba.”
Noel iżid, “Kważi wieħed ma jemminx kemm jgħaddi ż-żmien malajr. Għaddew dawn is-snin kollha li fihom kont f’dar aħjar, u f’din il-mixja kbira għamilt progress kbir. Issa għaddejtni fit-tul, sirt iktar tqil, u ma nistax nerfgħek aktar bħalma kont nagħmel bħal ajruplan.”
Hu jtemm jiktiblu, “Kompli kun id-dawl, ibni. Jien dejjem hawn għalik, issa u sal-aħħar ta’ ħajti. Inħobbok bla kundizzjoni, u jekk jogħġbok ftakar dejjem kliemi f’mumenti diffiċli: ‘Daniel, inti kapaċi tagħmilha.’ Tant imħabba mingħand Papa.”
Facebook / Noel Vella
