L-MEP Daniel Attard għadu kif ippreżenta r-rapport tiegħu dwar it-turiżmu sostenibbli fil-Parlament Ewropew – u jidher li x-xogħol tiegħu laqa’ approvazzjoni wiesgħa minn kważi l-gruppi politiċi kollha kif ukoll mill-Kummissjoni Ewropea. Pass li jikkonferma li l-prijoritajiet ta’ Malta, speċjalment bħala gżira, qed jinstemgħu b’saħħithom fi Brussell.
Konnettività għall-gżejjer: “Mhijiex lussu, iżda ħtieġa”
Attard saħaq li għal pajjiż bħal Malta, il-konnettività hija linja ta’ ħajja essenzjali – kemm għan-negozji kif ukoll għat-turiżmu. Fil-proposti tiegħu, huwa qed jimbotta għal:
- aktar flessibbiltà fir-regoli li jolqtu l-linji tal-ajru nazzjonali;
- investiment akbar f’trasport nadif u servizzi marittimi essenzjali;
- protezzjoni kontra dipendenza eċċessiva fuq linji tal-ajru privati;
- titjib fil-konnessjonijiet għall-Maltin u għat-turisti li fuqhom tiddependi l-ekonomija tagħna.
Turiżmu li jagħti ġieħ lill-komunitajiet u lill-ambjent
Fuq il-kwalità tal-ħajja, Attard jenfasizza li l-iżvilupp turistiku għandu jsir b’mod bilanċjat, partikolarment f’pajjiżi u bliet żgħar bħal tagħna. Ir-rapport jinkludi fost oħrajn:
- regoli aktar ċari u effettivi għall-kirjiet għal żmien qasir;
- pjanar aktar intelliġenti biex jiġu evitati pressjonijiet żejda f’żoni popolati;
- projbizzjoni tal-użu tal-plastik fl-industrija tat-turiżmu.
Ħaddiema fis-settur: aktar ħiliet u kundizzjonijiet aħjar
Fuq livell Ewropew, il-ħaddiema fis-settur turistiku ħafna drabi jaffaċċjaw sfidi bħal nuqqas ta’ taħriġ u pressjoni fuq il-kundizzjonijiet tax-xogħol. Attard qed jipproponi:
- Strateġija Ewropea għall-upskilling u reskilling;
- Tourism Skills Card biex l-esperjenza tal-ħaddiem tkun rikonoxxuta madwar l-Ewropa;
- aktar investiment fit-taħriġ permezz tal-programmi Ewropej.
Il-voluntiera u l-wirt kulturali fil-qalba tar-rapport
Parti importanti oħra tar-rapport tiffoka fuq il-kontribut tal-voluntiera li jżommu ħaj il-wirt kulturali ta’ Malta u tal-Ewropa. Proposti ewlenin jinkludu:
- qafas Ewropew ta’ appoġġ u rikonoxximent għall-voluntiera kulturali;
- fond Ewropew għall-wirt intanġibbli;
- aktar appoġġ għal inizjattivi komunitarji u tradizzjonijiet lokali.
“Bilanċ bejn it-turiżmu u l-komunità”
Fil-kumment tiegħu, Attard enfasizza li r-rapport qed jippreżenta viżjoni konkreta għal turiżmu sostenibbli:
“Dan ir-rapport huwa mibni fuq ir-realtajiet diversi tal-ibliet, il-pajjiżi u l-ġnus Ewropej li jagħtuna l-identità unika tagħna. Ilkoll differenti iżda ilkoll bi sfidi komuni li jirrikjedu soluzzjonijiet komuni biex insibu bilanċ bejn it-turiżmu u l-komunità, bejn l-iżvilupp ekonomiku u l-kwalità tal-ħajja.”
Ir-rapport issa jgħaddi għall-passi li jmiss fil-Parlament Ewropew u mistenni jikkontribwixxi b’mod dirett għall-istrateġija Ewropea għat-turiżmu sostenibbli li se tiġi ppublikata mill-Kummissjoni lejn nofs is-sena d-dieħla.
