Skont Enjoy Travel, pjattaforma tal-ivvjaġġar online ibbażata fir-Renju Unit, il-Belt Valletta hija t-tielet l-aqwa post fl-Ewropa biex tqatta’ Lejliet l-Ewwel tas-Sena. Il-pjattaforma ppubblikat il-lista annwali tagħha tal-aqwa 25 post fejn l-aħjar tqatta’ Lejliet l-Ewwel tas-Sena fl-Ewropa.
Il-pjattaforma tikkunsidra l-interessi tal-vjaġġaturi, l-appell kulturali u l-ipprogrammar staġjonali.
“Il-logħob tan-nar idawwal l-iskyline tal-Belt f’nofsillejl, b’wieħed mill-aqwa postijiet biex tara l-wirjiet ħdejn il-portijiet tal-belt, bl-ilmijiet brillanti tal-Mediterran jinbidlu f’kuluri inkredibbli,” huma kitbu.
“Hemm ukoll bosta ristoranti u bars madwar il-belt li joffru menus speċjalizzati għal Lejliet l-Ewwel tas-Sena jekk tixtieq tiċċelebra b’mod aktar paċifiku mal-familja jew ħbieb tiegħek filwaqt li xorta jkollok veduti inkredibbli tal-logħob tan-nar.”
Fit-tieni post ġiet Pariġi fi Franza u fl-ewwel post ġiet Edinburgh fl-Iskozja.
