Anton Refalo ħabbar li r-rizzi jinsabu fiċ-ċentru ta’ proġett xjentifiku ġdid li qed jitwettaq b’suċċess minn Aquatic Resources Malta, b’għan ewlieni li tissaħħaħ il-konservazzjoni ta’ din l-ispeċi fl-ibħra Maltin.
Permezz ta’ messaġġ fuq il-mezzi soċjali tiegħu, il-Ministru spjega li għall-ewwel darba qatt, bajd tar-rizzi ġie mfaqqas b’suċċess fil-laboratorju. Din l-inizjattiva innovattiva tifforma parti minn proġett xjentifiku li qed jimxi ‘l quddiem b’mod pożittiv u li għandu l-għan li jħares u jsaħħaħ il-popolazzjoni tar-rizzi fil-baħar tagħna.
Il-Ministru Refalo sostna li dan il-proġett qed jitwettaq flimkien mal-moratorju fuq il-qbid tar-rizzi, li ilu fis-seħħ sabiex jingħata ċans lill-ispeċi tirkupra. Skontu, dawn il-miżuri flimkien jirrappreżentaw pass konkret u importanti favur il-ħarsien tal-ambjent marittimu Malti.
Hu temm jgħid li inizjattivi bħal dawn juru l-impenn tal-awtoritajiet lejn il-protezzjoni tal-baħar Malti u lejn is-sostenibbiltà fit-tul tar-riżorsi naturali tiegħu, b’benefiċċju kemm għall-ambjent kif ukoll għall-ġenerazzjonijiet futuri.
