Kieku kien għadu magħna, llum kien ikun għeluq snin Glenn, ħu Selwun. F’dan il-jum, Selwyn kiteb messaġġ emozzjonanti ħafna b’dedikazzjoni għall-għażiż ħuħ.
“Qalbi nħossha maqsuma meta nikteb dan li ġej, għax nimmisjak aktar milli jistgħu qatt jesprimu l-kliem,” hu kiteb. “Dawn il-jiem tal-festi suppost ikunu mimlija ferħ u ċelebrazzjoni, iżda jfakkruni biss li ma nistax niċċelebrak. Dak l-uġigħ jaħkem aktar minn qatt qabel, u onestament, dan kien wieħed mill-aktar żminijiet diffiċli ta’ ħajti. Xi jiem iħosshom insapportabbli, imma għadni hawn, nagħmel l-almu tiegħi, anke meta qalbi tħossha tqila u għajjiena.”
“L-ebda ġurnata ma tgħaddi mingħajr ma nġorrok miegħi f’kull ħsieb, f’kull pass, f’kull mument. Grazzi talli pproteġejtni, gwidajtni, u qatt ma tlaqtni minn ħdejja. Naf li inti l-anġlu kustodju tiegħi; anke meta nħossni mitluf u mkisser, inħoss li żżommni inti,” hu kompla jgħid.
“Nixtieq b’qalbi kollha li kont għadek hawn, biex tkun tista’ tara kemm wasalt ’il bogħod, ir-raġel li sirt, u l-ħajja li qed nipprova nibni tant. Nittama li b’xi mod tarani, tismagħni, u tkun taf kemm inħobbok.”
“Nimmisjak ħafna. Għal dejjem ħija, għal dejjem l-anġlu tiegħi.”
Facebook / Selwyn Grech
