Filmat imtella’ minn Innocent Paws Malta reġa’ qajjem diskussjoni wiesgħa dwar l-imħabba u l-lealtà tal-annimali hekk kif wera mument sensittiv bejn kelba u qattus li kienu inseparabbli.
Lonzu, qattus ġinġri li għal żmien twil kien parti mill-familja tal-grupp, tilef ħajtu ftit sigħat qabel ma nġibed il-filmat. Fil-mumenti finali tiegħu, tidher Betty maġenbu – il-kelba li kienet trabbiet miegħu, tmelles rasu b’mod protettiv daqslikieku qed tagħti l-aħħar tislima.
Fuq il-midja soċjali, Innocent Paws ikkummentaw li dan il-mument “kissrilhom qalbhom”, filwaqt li enfasizzaw kif relazzjonijiet bħal dawn juru li l-annimali kapaċi jħossu u juru imħabba pura, spiss ferm aktar minn dak li wieħed jistenna.
Il-filmat ġabar mijiet ta’ kummenti ta’ solidarjetà u apprezzament, b’ħafna riflessjonijiet dwar kemm l-annimali jaf ikollhom rabtiet profondi bejniethom u man-nies li jieħdu ħsiebhom.
L-episodju ta’ Betty u Lonzu wera, għal darb’oħra, kemm il-kompassjoni fil-qasam tal-annimali hija importanti, speċjalment għal dawk li jgħaddu minn tbatija, abbandun jew mard.
Innocent Paws temmew il-messaġġ tagħhom billi kitbu “fly high, Lonzu 🌈🐈.” kliem sempliċi li laqat lil ħafna. Imħabba bħal din tibqa’ tixhed li l-annimali jħossu aktar milli ħafna drabi naħsbu.
Facebook/ Innocent Paws
