Fil-jum tal-festa tal-Madonna tad-Duluri, il-ħsieb ta’ ħafna jduru lejn dawk il-ġenituri li għaddew minn tbatija li ma tistax titfisser bil-kliem, ommijiet u missirijiet li kellhom jiffaċċjaw dak li ebda ġenitur m’għandu qatt jesperjenza. F’messaġġ emozzjonanti li qasmet Puttinu Cares, ingħatat ġieħ lil dawn il-familji li jġorru uġigħ kbir b’qawwa siekta u mħabba bla limiti.
Il-messaġġ ifakkar kif, minkejja d-dlam li jistgħu jgħaddu minnu, dawn il-ġenituri jibqgħu simbolu ta’ kuraġġ u reżiljenza. F’dik it-tbatija profonda, hemm ukoll xhieda ta’ mħabba li ma tintemm qatt, imħabba li ssir sors ta’ tama għal oħrajn.
Id-Duluri, li hija mfakkra proprju f’din il-festa, tirrappreżenta wkoll dan l-istess uġigħ. Hija simbolu ta’ omm li rat lil binha jbati, u għalhekk ħafna jsibu faraġ u qrubija lejha, speċjalment f’mumenti diffiċli.
Puttinu Cares temm il-messaġġ tiegħu b’talba li tmiss il-qalb, fejn talab lill-Madonna tad-Duluri biex iżżomm qrib tagħha lil dawk kollha li qed ibatu, tikkonsla kull qalb maqsuma u tagħti kuraġġ lil min jinsab fil-weġgħa.
F’dan il-jum partikolari, il-komunità hija mistiedna tieqaf għal mument u tirrifletti, mhux biss fuq it-tbatija, iżda wkoll fuq il-qawwa straordinarja li turi l-imħabba tal-ġenituri, imħabba li tibqa’ tgħix, anke fost l-akbar uġigħ.
Facebook / Puttinu Cares
