Dalgħodu, ftit wara s-07:30 ta’ filgħodu, id-Dipartiment tal-Protezzjoni Ċivili (CPD) ġie infurmat dwar inċident tat-traffiku li seħħ fil-Mellieħa, li fih kien involut trakk tal-LPG u li spiċċa nqaleb.
Minħabba n-natura sensittiva tal-inċident, għaddejja operazzjoni delikata u li mistennija tieħu ħin konsiderevoli.
Fuq il-post hemm preżenti timijiet tal-Protezzjoni Ċivili mill-istazzjonijiet 1, 3 u 10, li qed jissorveljaw is-sitwazzjoni u jipprovdu l-assistenza meħtieġa.
L-operazzjoni tinkludi t-trasferiment sigur tal-LPG mit-trakk maqlub għal tanker ieħor li nġieb apposta fuq il-post.
Fl-operazzjoni qed jieħdu sehem madwar 15-il pompier, megħjuna minn ħames vetturi tat-tifi tan-nar u żewġ uffiċjali.
Il-pubbliku qed jiġi mħeġġeġ jevita ż-żona u josserva l-istruzzjonijiet kollha mogħtija mill-awtoritajiet kompetenti.
