Meta kellu biss sitt snin, Javen kien qed jistenna li jagħmel il-praċett tiegħu, mument importanti fil-ħajja ta’ kull tifel Malti. Iżda f’dak iż-żmien, il-familja tiegħu sabet ruħha quddiem sfida ferm akbar, meta ġie djanjostikat b’kundizzjoni serja li bidlet ħajjithom għal kollox.
Minn dak il-mument, l-organizzazzjoni Puttinu Cares saret pilastru ta’ sapport kontinwu għall-familja. Kienet spalla li fuqha setgħu jistrieħu, mhux biss emozzjonalment, iżda wkoll b’appoġġ konkret f’waqt li kellhom jitilqu minn Malta biex ifittxu kura barra minn xtutna.
Il-vjaġġ tagħhom ma kienx wieħed faċli. Bejn l-Ingilterra u l-Ġermanja, il-familja qattgħet madwar sitt xhur ’il bogħod minn darhom, taffaċċja inċertezza, sfidi u sagrifiċċji kbar. Madankollu, minkejja kollox, il-kuraġġ u r-reżiljenza tagħhom baqgħu jispikkaw.
Illum, għaxar snin wara, Javen huwa żagħżugħ ta’ 16-il sena li qed jibni futur ġdid għalih innifsu. Bħalissa jinsab fl-ewwel sena tiegħu fil-MCAST, fejn qed jistudja l-IT, qasam li juri l-entużjażmu tiegħu għat-teknoloġija u l-iżvilupp personali.
Dawk li jafuh jiddeskrivuh bħala żagħżugħ b’qalb kbira, dejjem lest jgħin lill-oħrajn u jxerred il-pożittività madwaru. Il-kuraġġ li wera minn età żgħira għadu jidher fil-karattru tiegħu sal-lum.
Fil-ħin liberu tiegħu, Javen iħobb jieħu ħsieb saħħtu billi jmur il-gym, u għandu wkoll passjoni għall-ivvjaġġar, esperjenza li diġà kellu ħafna minħabba ċ-ċirkostanzi, iżda li llum japprezzaha minn perspettiva differenti.
Fost il-ħolm tiegħu hemm xewqa speċjali: li xi darba jmur safari fl-Afrika t’Isfel. Xewqa li tirrifletti mhux biss l-imħabba tiegħu għall-esplorazzjoni, iżda wkoll l-ispirtu ħieles u kuraġġuż li dejjem mexa miegħu tul ħajtu.
L-istorja ta’ Javen hija waħda ta’ sfida, tama u rebħa, tfakkira li anke fl-aktar mumenti diffiċli, il-kuraġġ u s-sapport jistgħu jwasslu għal futur sabiħ.
Facebook / Puttinu Cares
