“Merħba f’Artemis, Malta. Malta ingħaqdet ma’ grupp ta’ pajjiżi oħra impenjati biex jippreservaw ambjent sigur u sostenibbli fl-ispazju. Grazzi talli ngħaqadtu magħna!”
Malta uffiċjalment ingħaqdet mal-Artemis Accords, inizjattiva internazzjonali mmexxija min-NASA, u saret wieħed minn aktar minn 60 pajjiż li qed jaħdmu flimkien biex jiżguraw li l-esplorazzjoni tal-ispazju ssir b’mod sigur, trasparenti u sostenibbli. Dan il-ftehim volontarju jistabbilixxi prinċipji komuni dwar kif pajjiżi għandhom jaġixxu fl-ispazju, inkluż il-protezzjoni tal-ambjent spazjali u l-kooperazzjoni bejn nazzjonijiet.
Il-ftehim huwa marbut direttament mal-programm Artemis tan-NASA. Dan huwa programm ambizzjuż li għandu l-għan li jerġa’ jwassal lill-bniedem fuq il-Qamar, kif ukoll jiftaħ it-triq għal missjonijiet futuri lejn Mars u lil hinn. L-Artemis mhux biss jiffoka fuq esplorazzjoni, iżda wkoll fuq il-ħolqien ta’ preżenza sostenibbli fil-Qamar, billi jinvolvi kollaborazzjoni bejn pajjiżi u kumpaniji privati.
B’din il-mossa, Malta qed tidħol f’xibka globali ta’ pajjiżi li qed jiffurmaw il-futur tal-esplorazzjoni spazjali, pass li juri kif anke pajjiż żgħir jista’ jkollu rwol f’wieħed mill-akbar avventuri tal-umanità.
Facebook / NASA Artemis
