L-istaġun festiv dejjem iġib miegħu atmosfera mill-aqwa, ġeneruża u mimlija ċelebrazzjonijiet. Huwa żmien fejn in-nies jingħaqdu, jagħtu rigali lil xulxin u jgawdu ikliet speċjali mal-familja u l-ħbieb.
Iżda wara d-dawl jixegħel u l-pakketti sbieħ imżejna b’mod perfett, teżisti realtà inqas sabiħa: il-Milied huwa wkoll wieħed mill-aktar perjodi li jiġġenera skart. Mill-ippakkjar tar-rigali sal-ikel żejjed li jispiċċa jintrema, il-festi jibqgħu jagħmlu pressjoni fuq l-ambjent.
L-Awtorità għall-Ambjent u r-Riżorsi (ERA) qed tinkoraġġixxi lil kulħadd jagħżel għażliet aktar sostenibbli dan il-Milied, u tfakkarna li l-ferħ tal-istaġun m’għandux jiġi bi spiża għall-pjaneta tagħna. L-għanijiet huma sempliċi, niċċelebraw b’qalbna kollha, iżda nagħmlu dan b’deċiżjonijiet konxji li jnaqqsu l-iskart u jipproteġu l-ambjent.
Ippakkjar aktar sostenibbli
It-tradizzjoni tal-pakketti dekorattivi taħt is-siġra tal-Milied ilha tiġi mgħoddija minn ġenerazzjoni għal oħra. Għalkemm tidher sabiħa, ħafna mill-karti li nużaw illum mhumiex sostenibbli. Ħafna karti kummerċjali jinkludu l-foil, glitter, kisi tal-plastik jew laminazzjoni, elementi li jagħmlu r-rigal jidher mill-isbaħ, iżda fl-istess ħin dan il-materjal mhux riċiklabbli.
Meta żżid magħhom iż-żigarelli, iċ-ċfuf, l-ippakkjar tal-plastik u l-kaxxi disposable, tirrealizza kemm jista’ jakkumula malajr l-iskart f’dan l-istaġun. Imma permezz ta’ bidliet żgħar fil-mod kif inħejju u nippakkjaw ir-rigali jistgħu jagħmlu differenza kbira.
Il-bidla lejn ippakkjar sostenibbli mhux biss tgħin lill-ambjent, iżda tista’ tagħmel ir-rigali tiegħek jispikkaw b’mod sabiħ u mill-qalb. Hawn xi alternattivi aktar sostenibbli:
- Drapp li jerġa’ jintuża, bħal xalpi festivi jew ċratet, li jsiru parti mir-rigal innifsu.
- Karta riċiklata, magħmula minn materjal użat mill-ġdid u li tevita kisi li jleqq jew tal-plastik.
- Karta kraft sempliċi jew gazzetti qadima, li tista’ tippersonalizzahom bi tpinġijiet jew stampi naturali.
- Boroż jew kaxxi li jerġgħu jintużaw, li jistgħu jinżammu u jerġgħu jintużaw sena wara sena.
- Kartolini diġitali li jieħdu l-post tal-kartolini tradizzjonali li ħafna drabi jispiċċaw fil-bin.
Tnaqqis fl-iskart tal-ikel
Għalkemm l-ippakkjar tar-rigali huwa wieħed mill-akbar kontributuri għall-iskart tal-Milied, l-iskart tal-ikel huwa importanti bl-istess mod, speċjalment matul l-istaġun festiv. Ikliet kbar, laqgħat varji u xiri eċċessiv spiss iwasslu għal ikel li ma jittiekelx u jispiċċa jintrema.
L-iskart tal-ikel għandu konsegwenzi lil hinn mill-iskart innifsu: jirrappreżenta ħela ta’ riżorsi, enerġija u xogħol mitluf fil-produzzjoni, it-trasport u l-ħażna tiegħu.
Hawn xi suġġerimenti sempliċi iżda effettivi biex tnaqqas l-iskart tal-ikel dan il-Milied:
- Ipplannja l-ikliet b’għaqal: Agħmel lista realistika tax-xiri u ppjana l-porzjonijiet biex tevita xiri żejjed. Ikkunsidra n-numru ta’ mistednin u aġġusta r-riċetti skont il-bżonn.
- Żomm l-ikel kif suppost: Uża kontenituri li jistgħu jerġgħu jintużaw, iffriża l-ikel żejjed u oqgħod attent biex il-fdalijiet jiġu maħżuna malajr.
- Kun kreattiv bil-fdalijiet: Dundja jista’ jsir sandwiches, sopop jew torti jistgħu jittieklu f’jiem oħra. Il-ħaxix li jibqa’ jista’ jinbidel f’riċetti oħra.
- Qassam l-Ikel: Jekk tkun sajjart żejjed, ibgħat lill-mistednin b’porzjonijiet magħhom jew agħtihom lill-organizzazzjonijiet li jaċċettaw donazzjonijiet tal-ikel.
- Agħmel il-Kompost: Qxur tal-frott, fdal tal-ħaxix u skart organiku ieħor jistgħu jsiru kompost minflok jintremew.
Is-sostenibbiltà ma titlobx azzjonijiet kbar, iżda drawwiet kollettivi u ħsieb aktar konxju. Kemm jekk innaqqsu l-plastik, l-iskart tal-ikel jew inkomplu nagħżlu ippakkjar aktar sostenibbli għall-ambjent, kull pass żgħir jgħodd biex inżommu l-ambjent tagħna b’saħħtu.
