Brandon Terribile qasam messaġġ sinċier dwar ir-relazzjoni tiegħu mal-piż u l-vjaġġ li bħalissa qed jagħmel biex iħossu aktar b’saħħtu, f’saħħtu u kunfidenti fih innifsu. Brandon spjega li tul ħajtu l-piż tiegħu dejjem kellu t-tendenza li jinbidel u li dieti riġidi qatt ma kienu għalih. Minflok, jixtieq isib bilanċ li jippermettilu jgawdi l-ħajja filwaqt li jaħdem biex isir aktar b’saħħtu u f’kundizzjoni fiżika aħjar.
Parti importanti ħafna minn dan il-vjaġġ kienet il-boxing. Hu spjega li dan l-isport tah ħafna aktar minn sempliċiment eżerċizzju fiżiku, hekk kif għenu jikseb aktar saħħa, dixxiplina u kunfidenza, filwaqt li tah mezz biex iħossu aktar b’saħħtu f’ġismu stess. Brandon irringrazzja wkoll lill-kowċ tiegħu Roland Sammut ta’ Good Vibes Boxing & Fitness, kif ukoll lil ħuh Cleaden Terribile, tal-appoġġ tagħhom matul dan il-vjaġġ.
"Bħalissa qed nitlef dawn il-kilos għalija. Mhux biex nilħaq l-istandards ta’ ħaddieħor u mhux biex nipprova xi ħaġa lil xi ħadd," fisser Brandon. Hu żied li l-għan tiegħu hu li jħossu aktar b’saħħtu, f’saħħtu, kunfidenti u komdu fih innifsu. Hu ammetta wkoll li jaf li fil-futur jista’ jerġa’ jżid xi ftit mill-piż li jkun tilef, iżda llum tgħallem jaċċetta l-mod kif jaħdem ġismu minflok jikkastiga lilu nnifsu minħabba f’hekk.
"Il-piż tiegħi jista’ jinbidel, iżda s-saħħa, id-determinazzjoni u l-valur tiegħi nnifsi qegħdin hawn biex jibqgħu. U l-boxing fakkarni kemm jien verament b’saħħti," temm jgħid. Messaġġ importanti li jfakkar li vjaġġ lejn stil ta’ ħajja aktar b’saħħtu mhux bilfors għandu jkun wieħed perfett jew marbut biss man-numru li jidher fuq il-miżien, iżda jista’ jkun wieħed ta’ perseveranza, bilanċ u kunfidenza fik innifsek.
Facebook / Brandon Terribile
