Permezz ta’ kitba fuq il-paġna tagħhom, Maltese Islands Weather qasmu mas-segwaċi tagħhom ftit informazzjoni rigward xi tfisser ir-raġġiera li rajna llum max-xemx.
Qalu, “Raġġiera madwar ix-xemx fuq il-Gżejjer Maltin – Illum rajna ’22° halo’, jew raġġiera, madwar ix-xemx – fenomenu ottiku li jseħħ meta d-dawl tax-xemx jgħaddi minn kristalli żgħar tas-silġ fil-livelli għoljin tal-atmosfera. Dawn il-kristalli, li jiffurmaw sħab irqiq ta’ cirrostratus, iwasslu għal rifrazzjoni tad-dawl tax-xemx biex dan jinqasam fis-seba’ kuluri – simili għal qawsalla.”
Żiedu, “Raġġiera bħal din ħafna drabi jkunu sinjal ta’ sħab għoli abbinat ma’ żona nstabbli, u kultant jindikaw bidla fit-temp. Fil-każ tagħna llum hemm żona nstabbli lejn in-nofsinhar. Dan il-fenomenu, b’mod mill-aktar preċiż, huwa sinjal minn natura ta’ temp instabbli fil-qrib u kien wieħed mill-ħafna għodod li bihom missirijietna setgħu jkunu jafu li l-maltemp kien fil-qrib. Taħlita perfetta ta’ xjenza u ġmiel in-natura.”
