BCRS Malta, l-operatur liċenzjat tal-Iskema Nazzjonali tar-Rifużjoni tal-Kontenituri tax-Xorb (BCRS), ħabbret aġġornament ewlieni li jippermetti l-ġbir bieb bieb ta’ kontenituri tax-xorb permezz ta’ Reverse Vending Machines (RVMs) mgħammra apposta.
L-inizjattiva kienet possibbli permezz ta’ kollaborazzjoni mill-qrib mad-Diviżjoni tat-Tindif u l-Manutenzjoni, retailers, fornituri tal-RVM, fornituri ta’ sistemi diġitali, u taħt is-superviżjoni tar-regolatur, Circular Economy Malta.
Is-servizz bieb bieb tal-RVM jippermetti lir-residenti, speċifikament detenturi ta’ karti tal-identità ta’ 60+ sena u detenturi tal-Blue Badge, li jirritornaw fliexken tal-PET, bottijiet tal-aluminju, u kontenituri tal-ħġieġ direttament permezz ta’ vetturi tal-ġbir minn wara l-bieb.
Biex tappoġġja din il-funzjonalità, BCRS implimentat Central Redemption Server, pjattaforma ċentralizzata li tintegra diversi sistemi POS mar-retailers madwar il-pajjiż kollu.
Din is-sistema tiżgura li l-kontenituri kollha, kemm jekk permezz ta’ RVMs fissi jew dawk bieb bieb, jiġu pproċessati bla xkiel, u l-vawċers jistgħu jiġu mifdija b’mod effiċjenti.
“Ir-riżultati u l-appoġġ għal dawn l-inizjattivi juru li BCRS Malta qed tagħti kontribut tanġibbli lill-ambjent għall-benefiċċju ta’ kulħadd,” qal Alexander Galea, Kap Eżekuttiv ta’ BCRS Malta.
“Dan il-proġett juri l-kollaborazzjoni b’saħħitha bejn il-bejjiegħa bl-imnut, il-fornituri tas-sistemi, u d-Diviżjoni tat-Tindif u l-Manutenzjoni, li kollha jaħdmu flimkien biex isaħħu l-infrastruttura tal-iskema.”
L-appoġġ ipprovdut minn BCRS lill-proġett pilota li jinvolvi RVMs bieb bieb lura f’Lulju 2025, flimkien ma’ investiment ta’ aktar minn €100,000, wera s-suċċess tal-idea.
Minbarra l-investiment, BCRS Malta qed tħallas lid-Diviżjoni tat-Tindif u l-Manutenzjoni tariffa ta’ mmaniġġjar għal kull kontenitur miġbur.
BCRS Malta hi wkoll kburija li tirrapporta li l-iskema qed tkompli tikkontribwixxi għall-progress ambjentali f’Malta.
Mill-bidu tal-iskema f’Novembru 2022, BCRS ġabret 722 miljun kontenitur tax-xorb, ekwivalenti għal aktar minn 33,600 tunnellata, li kollha ntbagħtu għar-riċiklaġġ.
Fl-2025, l-iskema laħqet rata ta’ ġbir ta’ 86%, li tammonta għal 242 miljun kontenitur tax-xorb tal-PET, tal-ħġieġ u tal- aluminju, ekwivalenti għal 11,000 tunnellata ta’ materjal għar-riċiklaġġ.
Dawn ir-riżultati juru li l-miżuri operattivi kontinwi introdotti biex itejbu d-disponibbiltà u s-servizz lill-klijenti tagħha qed iwasslu għal benefiċċji ambjentali tanġibbli. BCRS Malta tibqa’ impenjata li tkompli ssaħħa l-iskema, ittejjeb l-effiċjenza, u tappoġġja l-miri nazzjonali tar-riċiklaġġ.
Għal aktar tagħrif u aġġornamenti, wieħed huwa mħeġġeġ iżur www.bcrsmalta.mt.
