Mument sempliċi iżda mimli tifsira, hekk iddeskrivietu Gillian Attard hekk kif qasmet riflessjoni intima dwar l-imħabba u s-sens ta’ sigurtà li ssib fil-persuna li tħobb.
Fuq il-midja soċjali, Gillian qalet li r-ritratt li ppubblikat jgħid ħafna minn dak li xi drabi ssibha diffiċli tpoġġi fi kliem. “Huwa paċi… huwa sens ta’ sigurtà… hija mħabba li tikber bil-kwiet, aktar fil-fond kuljum,” kitbet, waqt li fetħet qalbha dwar ir-realtà tal-ħajja ta’ kuljum.
Hija ammettiet li ħajjitha mhux dejjem perfetta, bħal ħafna oħrajn, tgħaddi minn ġranet fejn tħossha għajjiena, megħluba u xi kultant anke mitlufa fost il-ħsibijiet. Iżda fost dawn il-mumenti kollha, hemm persuna li tagħmilha tħossha mifhuma u sostnuta.
Skont Gillian, hija l-preżenza tiegħu, il-mod kif iżommha u jifhimha mingħajr ma jkollha tispjega, li tagħmel differenza kbira. Saħansitra semmiet kif ġest żgħir bħal bewsa kapaċi jtaffi l-piż li tkun qed iġġorr.
Din, skontha, hija l-imħabba vera: mhux dik perfetta, iżda dik onesta. Imħabba li tibqa’, li tappoġġja u li tagħżlek kif int, mingħajr pretensjonijiet. Hija temmet il-messaġġ tagħha b’ringrazzjament sinċier lejn is-sieħeb tagħha George, filwaqt li esprimiet gratitudni wkoll lejn il-fotografu Kris Micallef li rnexxielu jaqbad dan il-mument naturali u emozzjonanti, memorja li qalet se tibqa’ tgħożż għal dejjem.
Storja li tfakkarna li kultant, fil-ħajja mimlija sfidi, huma dawn il-mumenti żgħar u sinċieri li jagħtu l-akbar sens ta’ paċi u mħabba.
Facebook / Gillian Attard
