Permezz ta’ kitba fuq il-paġna tagħha, Sarah Bajada qasmet messaġġ sabiħ fl-okkażjoni ta’ Jum il-Missier. Għalkemm dan huwa jum sabiħ għal bosta min-nies li jistgħu jiċċelebrawh mal-għeżież tagħhom, jista’ jkun ukoll jum daqstant diffiċli għal dawk li ma jistgħux.
Bdiet billi qalet, “Dalgħodu kont se nikteb messaġġ tradizzjonali għal Jum il-Missier, iżda mbagħad waqaft naħseb. Bħala persuna fortunata biżejjed li għandha relazzjoni mill-isbaħ ma’ missierha, naf kemm hu faċli għalija li niċċelebra din il-ġurnata miegħu. Fl-istess ħin, naf ukoll li għal ħafna oħrajn dan il-jum jista’ jkun jum mimli emozzjonijiet differenti.”
Żiedet tgħid, “Għalhekk illum qed naħseb ukoll f’dawk li, bħal Alex, tilfu lil missierhom kmieni wisq, iżda li xorta waħda dejjem nisimgħu kliem mill-isbaħ dwaru. F’dawk li kibru mingħajr il-preżenza ta’ missier f’ħajjithom. Fil-missirijiet li tilfu lil uliedhom. F’dawk il-missirijiet li kuljum jieħdu ħsieb tfal b’diżabilità jew b’ħtiġijiet oħra. Fil-missirijiet waħedhom li jġorru r-responsabbiltajiet kollha fuq spallejhom. U fl-irġiel li jixtiequ jsiru missirijiet iżda qed jiffaċċjaw infertilità jew triq diffiċli biex isiru ġenituri.”
Qalet ukoll, “Qed naħseb ukoll fil-missirijiet li flimkien mas-sieħba tagħhom, għaddew mill-uġigħ kbir ta’ korriment fit-tqala, u li jġorru f’qalbhom l-imħabba għal tarbija li qatt ma kellhom l-opportunità jżommu f’dirgħajhom.”
Temmet il-kitba tagħha billi qalet, “Dawn l-emozzjonijiet huma importanti wkoll. U lill-missirijiet, lill-passirijiet, lin-nanniet u lill-figuri paterni kollha li kuljum ikunu preżenti b’imħabba, paċenzja, saħħa u ġentilezza, nawguralkom Jum il-Missier it-Tajjeb.”
