Il-Kunsilli Lokali madwar Malta u Għawdex se jkunu qed jibbenefikaw minn €5 miljun f’fondi addizzjonali permezz ta’ diversi skemi amministrati mid-Diviżjoni għall-Gvern Lokali.
Dawn il-fondi se jitqassmu fuq numru ta’ inizjattivi li jkopru oqsma differenti fosthom il-kultura, l-infrastruttura, il-manutenzjoni u t-tindif tal-lokalitajiet. L-għan ewlieni hu li jiġu sostnuti proġetti u attivitajiet li jkollhom impatt dirett fuq il-komunitajiet u r-residenti.
Fost l-iskemi marbuta mal-kultura hemm dawk għall-Attivitajiet Kulturali Annwali 2026, l-Attivitajiet tal-Milied 2026 u l-Attivitajiet tal-Karnival 2027. Dawn huma maħsuba biex jgħinu lill-kunsilli jorganizzaw attivitajiet li jsaħħu l-identità kulturali u jġibu lin-nies flimkien fil-lokalitajiet tagħhom.
Barra minn hekk, hemm l-iskema Komunitajiet Aktar B’Saħħithom u ta’ Kwalità, il-Fond ta’ Manutenzjoni u Sostenn ta’ Proġetti Infrastrutturali Maġġuri li diġà twettqu, kif ukoll inizjattiva finanzjarja mmirata lejn Lokalitajiet Aktar Nodfa. Dawn l-iskemi jiffokaw fuq titjib konkret fl-ambjent urban u fil-kwalità tal-ħajja tar-residenti.
Skont id-dettalji mogħtija, din is-sena l-allokazzjoni żdiedet għal €5 miljun, meta s-sena ta’ qabel kienu tqassmu aktar minn €4 miljun fuq sitt skemi differenti. Fl-aħħar sena ġew organizzati 61 attività kulturali madwar Malta u Għawdex, 50 attività tal-Karnival, 53 inizjattiva ambjentali marbuta mal-Jum Dinji għat-Tindif, kif ukoll 45 proġett kapitali u disa’ proġetti oħra ta’ manutenzjoni u sostenn.
Mill-aspett finanzjarju, l-iskema Komunitajiet Aktar B’Saħħithom u ta’ Kwalità tista’ tilħaq finanzjament sa €100,000 għal kull proġett, filwaqt li l-iskema tal-Attivitajiet Kulturali tipprovdi kontribuzzjoni massima ta’ €20,000 għal kull attività.
B’dawn il-fondi, il-Kunsilli Lokali se jkollhom aktar riżorsi biex jimplimentaw inizjattivi li jtejbu l-infrastruttura, isaħħu l-ħajja kulturali u jkomplu jinvestu f’lokalitajiet aktar nodfa u organizzati madwar Malta u Għawdex.
