Dejjem sabiħ meta tara żgħażagħ jagħżlu li jagħmlu xi ħaġa differenti u ddedikata għall-oħrajn. Il-Parroċċa ta’ Marija Annunzjata f’Ħal Tarxien għadha kif ħabbret li erba’ persuni mill-komunità tagħhom—Sophia, Gabriel, Andrea, u Marvic—bdew vjaġġ speċjali ħafna. Dawn iż-żgħażagħ xammru kmiemhom u rħewlha lejn il-Kolombja biex jgħixu esperjenza missjunarja li se ddum xahar sħiħ.
Vjaġġ bħal dan, f’kontinent ieħor u f’realtà kompletament differenti minn tagħna, mhuwiex faċli, imma żgur li se jkun ta’ ġid kbir kemm għalihom u kemm għan-nies li se jiltaqgħu magħhom. Il-parroċċa wriet l-appoġġ kollu tagħha u ddedikatilhom messaġġ ta' kuraġġ biex din l-esperjenza timliehom b'ferħ u entużjażmu għal aktar ħidma fil-komunità.
Bħala komunità, il-parroċċa wiegħdet li se żżomm lil dawn l-erba' żgħażagħ fit-talb tagħha matul dan ix-xahar kollu. Awguri minn qalbna għal din l-avventura mill-isbaħ!
Facebook/Parroċċa Marija Annunzjata Ħal Tarxien
