Company of Dance Arts se tkun qed tippreżenta produzzjoni ta’ Romeo and Juliet fit-Teatru Manoel, is-Sibt 10 ta’ Ottubru fis-19:30. Din il-produzzjoni se tagħti ħajja ġdida lill-istorja immortali ta’ William Shakespeare permezz taż-żfin, b’koreografija espressiva, mużika, elementi viżivi teatrali u interpretazzjonijiet minn għadd ta’ artisti lokali.
Taħt id-direzzjoni artistika ta’ Sara Bianchi, Andrew Camenzuli se jinterpreta l-parti ta’ Romeo, filwaqt li Mattea Bianchi se tidħol fil-parti ta’ Juliet. “Romeo and Juliet hija storja mimlija emozzjonijiet qawwija – imħabba, tama, kunflitt, passjoni u fl-aħħar nett traġedja. Permezz tal-koreografija ridt inħalli dawn l-emozzjonijiet jitkellmu permezz tal-moviment,” spjegat Sara Bianchi.
Il-koreografija hija f’idejn Sara Bianchi u Nicoletta Pizzicotti, filwaqt li fil-produzzjoni se jieħdu sehem ukoll l-artisti mistiedna Luke Bugeja Gauci, Andrew Spiteri u Ben Spiteri. Din l-interpretazzjoni tgħaqqad influwenzi klassiċi ma’ moviment kontemporanju biex twassal l-imħabba, il-passjoni, ir-rivalità u t-traġedja li għamlu lil Romeo and Juliet waħda mill-aktar stejjer magħrufa fid-dinja.
Romeo and Juliet se tittella’ għal lejla waħda biss, is-Sibt 10 ta’ Ottubru fis-19:30 fit-Teatru Manoel, il-Belt Valletta.
