Il-Bank of Valletta laqqa’ flimkien mijiet ta’ kollegi għall-BOV People Awards, avveniment annwali li jirrikonoxxi lill-impjegati u t-timijiet li permezz tal-impenn, il-professjonalità u l-ideat tagħhom jikkontribwixxu għas-suċċess tal-Bank. Matul is-serata ġew ippremjati kisbiet f’diversi kategoriji, filwaqt li ġiet iċċelebrata l-ħidma ta’ timijiet minn oqsma differenti, fosthom dawk li jaħdmu direttament mal-klijenti, kif ukoll fl-operat, it-teknoloġija, ir-riskju u l-governanza.
Il-Kap Eżekuttiv tal-Bank, Kenneth Farrugia, saħaq li n-nies jibqgħu l-akbar saħħa tal-BOV. “Kull tragward li nilħqu bħala Bank huwa mibni fuq l-impenn, it-talent u d-determinazzjoni tal-kollegi tagħna,” qal, filwaqt li sostna li l-premjijiet huma opportunità biex il-Bank jirringrazzja lil dawk li jagħmlu differenza kuljum.
Huwa enfasizza wkoll l-importanza ta’ aktar kollaborazzjoni u xogħol bħala Bank wieħed biex jintlaħqu l-ambizzjonijiet għall-futur. Iċ-Chief People and Culture Officer, Ray Debattista, qal li s-suċċess tal-Bank jibda min-nies tiegħu u li huwa essenzjali li jinħoloq ambjent fejn l-impjegati jħossuhom apprezzati, appoġġjati u mħeġġa jikbru.
Din is-sena, il-kollegi kellhom ukoll sehem dirett permezz tal-People’s Choice Awards, fejn setgħu jirrikonoxxu lil dawk l-impjegati li ħallew impatt pożittiv permezz tal-ħidma, l-attitudni u d-dedikazzjoni tagħhom. Il-BOV People Awards jagħmlu parti mill-impenn tal-Bank favur l-iżvilupp professjonali, il-benesseri u l-involviment tal-impjegati tiegħu.
Facebook / Bank of Valletta
