Jidher li l-mewġa intensa ta' sħana li laqtet lill-Gżejjer Maltin għadha 'l bogħod milli tintemm, hekk kif Maltese Islands Weather estenda u aġġorna t-twissija sa tal-inqas l-Erbgħa, 22 ta' Lulju. Skont it-tbassir, il-mewġa tas-sħana li qed tiddomina r-reġjun se tkompli żżomm temperaturi għoljin ħafna, b'żieda gradwali minn jum għal ieħor. Bejn illum il-Ġimgħa u t-Tlieta, it-temperaturi massimi mistennija jvarjaw bejn id-39°C u l-41°C.
Anke matul il-lejl, is-sħana mhux se tonqos ħafna, hekk kif it-temperaturi minimi huma mistennija jibqgħu bejn is-27°C u d-29°C. Dan ifisser li l-ġisem ikollu ftit opportunità biex jirkupra mis-sħana tal-ġurnata. Is-sema se jibqa' kemxejn imdaħħan, filwaqt li l-UV Index se jibqa' f'livell estrem (10), għalhekk huwa importanti li kulħadd jieħu l-prekawzjonijiet meħtieġa.
L-esperti qed iħeġġu lill-pubbliku biex jixrob ħafna ilma, jevita attivitajiet fiżiċi matul l-aktar sigħat sħan tal-ġurnata u jilbsu ħwejjeġ ħfief flimkien ma' protezzjoni mix-xemx. Appell partikolari sar biex tingħata attenzjoni lit-trabi, lit-tfal żgħar, lill-anzjani u lil persuni vulnerabbli, kif ukoll biex ma jintesewx l-annimali domestiċi li għandhom dejjem ikollhom aċċess għal ilma frisk u dell.
Twissija oħra hija dwar ir-riskju għoli ta' nirien fil-kampanja minħabba l-kundizzjonijiet niexfa, u għalhekk il-pubbliku huwa mħeġġeġ jevita kull attività li tista' tqabbad in-nar. L-aħbar tajba hija li hemm indikazzjonijiet li din il-mewġa ta' sħana tista' tintemm lejn l-aħħar tal-ġimgħa d-dieħla, meta riħ qawwi mill-Majjistral mistenni jġib miegħu arja ferm aktar friska u jwassal għal tnaqqis sostanzjali fit-temperaturi.
