Il-prezzijiet tal-kondoms jistgħu jiżdiedu b’mod sinifikanti fix-xhur li ġejjin, hekk kif l-akbar manifattur fid-dinja, Karex Bhd, qed jikkunsidra żieda bejn 20% u 30%.
Skont il-Kap Eżekuttiv tal-kumpanija, Goh Miah Kiat, din id-deċiżjoni qed tittieħed minħabba diffikultajiet fil-katina tal-provvista marbuta mal-kunflitt fil-Lvant Nofsani, li qed jolqot il-produzzjoni globali, speċjalment fejn jidħlu l-enerġija u l-materja prima tal-petrokimiċi.
Karex tipproduċi aktar minn 5 biljun kondom fis-sena u tipprovdi prodotti lil marki magħrufa internazzjonalment kif ukoll lil sistemi tas-saħħa u programmi ta’ għajnuna appoġġjati min-Nazzjonijiet Uniti.
Barra minn hekk, id-domanda qed tkompli tiżdied, filwaqt li ħafna klijenti qed jesperjenzaw nuqqas ta’ stokks minħabba dewmien fil-merkanzija u żieda fl-ispejjeż tat-trasport.
Din is-sitwazzjoni qed tqajjem tħassib dwar kif il-kunflitt internazzjonali qed ikompli jaffettwa prodotti essenzjali ta’ kuljum, u jista’ jkollha impatt dirett fuq il-konsumaturi madwar id-dinja.
